کراچی: شہر قائد کے علاقے ملیر الفلاح سے 12 روز قبل اغوا ہونے والی بچی کی گمشدگی کا معمہ حل ہوگیا، پولیس نے ملزمہ کو گرفتار کیا جو بچی کی خالہ ہیں۔
پولیس حکام کے مطابق ملیر کے علاقے الفلاح سے بارہ روز قبل نومولود بچی کا اغوا کیا گیا تھا، جس پر ماں نے تھانے میں گزشتہ روز مقدمہ درج کروایا، جس کے بعد پولیس نے واقعے کی تحقیقات کا آغاز کیا۔
تفتیشی افسر کے مطابق سی سی ٹی وی فوٹیج حاصل کر کے جب ان کا بغور مشاہدہ کیا گیا تو دو خواتین بچی کو لے جاتی ہوئیں نظر آئیں۔ اس ویڈیو کو جب اہل خانہ نے دیکھا تو وہ پہچان گئے کیونکہ اس میں بچی کی خالہ ایک دوسری خاتون کے ساتھ بچی کو لے کر جارہی تھیں۔
مزید پڑھیں: کراچی میں گھر سے بچی اغوا، فوٹیج سامنے آگئی
پولیس نے سی سی ٹی وی فوٹیج کی مدد سے ہونے والی شناخت کے بعد خاتون کے گھر پر چھاپہ مارا جہاں سے بچی بازیاب ہوئی۔ پولیس حکام کے مطابق بچی کو خالہ اور رشتے داروں نے اغوا کیا تھا، دونوں کو حراست میں لے کر تھانے منتقل کردیا گیا ہے۔
ذرائع کے مطابق ملزمان کی شناخت کے لیے پولیس نے متاثرہ خاتون کا بیان لیا جس کے بعد سی سی ٹی وی فوٹیج بھی حاصل کی گئیں تھیں۔