ہرارے: پاکستان کے خلاف سیریز سے قبل زمبابوین کپتان شان ولیمز نے بڑا دعویٰ کردیا۔
تفصیلات کے مطابق پاکستان کے خلاف ٹی ٹوینٹی سیریز سے قبل زمبابوین کپتان شان ولیمز کا کہنا ہے کہ بابر اعظم زبردست کھیل رہے ہیں لیکن ہمارے پاس بابر اعظم کو روکنے کے لیے بولر موجود ہیں۔
شان ولیمز نے کہا کہ پاکستانی ٹیم اچھی کرکٹ کھیل رہی ہے، جنوبی افریقہ کے خلاف پاکستان نے اچھی کارکردگی کا مظاہرہ کرکے سیریز جیتی۔
واضح رہے کہ پاکستان اور زمبابوے کے درمیان پہلا ٹی ٹوینٹی میچ کل ہرارے اسپورٹس کلب میں کھیلا جائے گا۔
پاکستان اور زمبابوے کے درمیان اب تک کھیلے گئے تمام 14 ٹی ٹوینٹی میچوں میں جیت پاکستان کے نام رہی۔
اگرچہ پوائنٹس کم ہونے یا بڑھنے سے پاکستان کی چوتھی پوزیشن پر کوئی اثر نہیں پڑے گا مگر صرف ایک شکست کی صورت میں پانچویں نمبر پر موجود نیوزی لینڈ سے اس کا فرق صرف 5 پوائنٹس کا رہ جائے گا۔
یاد رہے کہ ٹی 20 کرکٹ میں اس وقت انگلینڈ کی ٹیم 272 پوائنٹس کے ساتھ پہلے نمبر پر ہے جب کہ 270 پوائنٹس کے ساتھ بھارت دوسرے اور 267 پوائنٹس کے ساتھ آسٹریلیا تیسرے نمبر موجود ہے۔
پاکستان نے آخری مرتبہ 2018 میں زمبابوے کا دورہ کیا تھا، جہاں کھیلے گئے سہ فریقی ٹورنامنٹ کے فائنل میں پاکستان نے آسٹریلیا کو شکست دی تھی۔
