مکہ مکرمہ: وزیراعظم عمران خان اور خاتون اول بشریٰ بی بی نے عمرے کی سعادت حاصل کرلی۔
اے آر وائی نیوز کے مطابق معاون خصوصی برائے سیاسی روابط شہباز گل نے سماجی رابطے کی ویب سائٹ ٹویٹر پر بتایا کہ وزیراعظم عمران خان اور خاتون اول نے عمرے کی سعادت حاصل کرلی۔
شہباز گل نے لکھا کہ وزیراعظم اور وفد کے لیے خانہ کعبہ کا دروازہ خصوصی طور پر کھولا گیا، وزیراعظم، خاتون اول اور وفد نے خانہ کعبہ کے اندر نوافل ادا کیے۔
وزیراعظم عمران خان اور خاتون اوّل بشری عمران نے عمرہ کی سعادت مکمل کی۔ وزیراعظم اور ان کے وفد کے لئیے خانہ کعبہ کا دروازہ خصوصی طور پر کھولا گیا۔ وزیراعظم اور خاتون اوّل اور وفد نے خانہ کعبہ کے اندر نوافل ادا کئیے۔
— Dr. Shahbaz GiLL (@SHABAZGIL) May 9, 2021
اس سے قبل وزیرِاعظم عمران خان نے گزشتہ روز اپنے وفد کے ہمراہ روضہ رسول صلی اللّہ علیہ والہ وسلم پر حاضری دی تھی، انہوں نے پاکستان کی ترقی و خوشحالی، امت مسلمہ کی یکجہتی، کورونا وبا سے نجات کے لئے خصوصی دعا کی۔
وزیرِاعظم نے وفد سمیت مسجدِ نبوی (صلی اللہ علیہ وآلہ وسلم) میں افطار بھی کیا اور نمازِ مغرب اور عشا ادا کی تھی۔
PM and First Lady in Makkah pic.twitter.com/TwNokmjTms
— Dr. Shahbaz GiLL (@SHABAZGIL) May 9, 2021
اس موقع پر وزیرِ خارجہ شاہ محمود قریشی، وزیرِ داخلہ شیخ رشید احمد، گورنر سندھ عمران اسماعیل، گورنر خیبر پختونخوا شاہ فرمان، سینیٹر فیصل جاوید خان اور صوبائی وزیر علیم خان ، معاونِ خصوصی برائے سیاسی مواصلات ڈاکٹر شہباز گل اور وزیرِ اعظم کے نمائندہ خصوصی برائے مذہبی ہم آہنگی مولانا طاہر اشرفی بھی وزیراعظم کے ہمراہ تھے۔
خیال رہے کہ وزیراعظم عمران خان، سعودی ولی عہد شہزادہ محمد بن سلمان کی دعوت پر تین روزہ دورے پر ہیں۔
