کراچی: سندھ اسمبلی کا اجلاس شروع ہوتے ہی ہنگامی آرائی کی نذر ہوگیا، پیپلزپارٹی رہنما سہیل انور سیال نے پی ٹی آئی رکن کو مارنے کی کوشش کی۔
اے آر وائی نیوز کے مطابق سندھ اسمبلی میں پی ٹی آئی نے سندھ کے حصے کا پانی دینے کی قرارداد کی مخالفت کی تو سہیل انور سیال غصے میں آگئے اور پی ٹی آئی رکن کو مارنے کی کوشش کی۔
پی ٹی آئی رکن محمد علی جی جی نے قرارداد کی مخالفت کرتے ہوئے کہا تھا کہ ارسا پانی حصے کا دے رہا ہے، پانی تو سندھ میں ہے، ایک لوٹا پہلے کہتا تھا کہ پیپلزپارٹی والے پانی لے گئے ہیں۔
صوبائی وزیر آبپاشی سہیل انور سیال نے کہا کہ جو پانی پر صوبے کی مخالفت کرے گا ان کے گھروں میں گھسیں گے، تم لوگ پانی کی مخالفت کرتے ہوئے شرم آنی چاہیے، ایم این ایز قومی اسمبلی میں تسلیم اور یہاں مخالفت کررہے ہیں۔
سہیل انور سیال پی ٹی آئی اراکین کی طرف حملے کے لیے لپکے تو ساتھیوں نے انہیں روک لیا۔
دوسری جانب ایم کیو ایم پاکستان کی رکن منگلا شرما نے قرارداد کی حمایت کرتے ہوئے کہا کہ سندھ کو پانی کیوں نہیں مل سکتا، پانی کی کمی کی وجہ سے ہماری فصلیں تباہ ہوں گی۔
انہوں نے کہا کہ ارسا میں اتنی ہمت نہیں کہ وہ بہتر موقف پیش کرے، مکیش کمار چاؤلہ نے کہا کہ آج قومی اسمبلی میں اسٹینڈنگ کمیٹی نے مانا ہے، پی ٹی آئی والوں پر افسوس ہورہا ہے۔
