The news is by your side.

Advertisement

کرونا لاک ڈاؤن: ایم کیو ایم کے اراکین کا سندھ اسمبلی میں‌ شدید احتجاج

کراچی: متحدہ قومی موومنٹ (ایم کیو ایم) پاکستان کے اراکین اسمبلی نے کرونا پابندیوں کے خلاف ایوان میں اسپیکر کی نشست کے سامنے کھڑے ہوکر شدید احتجاج کیا اور حکومت پر سنگین الزامات بھی عائد کیے۔

اے آر وائی نیوز کے مطابق آغا سراج درانی کی زیر صدارت سندھ اسمبلی کا اجلاس ہوا، جس میں ایم کیو ایم کے اراکین نے کرونا ایس او پیز کے نام عائد ہونے والی تجارتی پابندیوں کی شدید مخالفت کی۔

ایم کیو ایم اراکین کو ایوان میں بولنے کی اجازت نہ ملنے پر اراکین اپنی نشستوں سے احتجاجاً کھڑے ہوئے اور اسپیکر کی نشست کو گھیر کر احتجاج ریکارڈ کرایا۔ایم کیوایم اراکین بینرز تھامے اسپیکر ڈائس کےسامنے کھڑے رہے، جس پر انہیں آغا سراج درانی نے اپنی نشستوں پر بیٹھنے کا مشورہ بھی دیا۔

آغا سراج درانی نے کہا کہ ’پہلے سوال جواب ہوں گے اُس کے بعد آپ کو بولنے کا موقع دیاجائےگا، میں کوئی ڈکٹیشن  نہیں لوں گا‘۔ انہوں نے احتجاج پر ریمارکس دیے کہ ’آپ (ایم کیو ایم والے) ہاؤس کی کارروائی کو چلانا نہیں چاہتے، آپ کی آواز کوئی نہیں دبائے گا اور میں ایسا کیوں کروں گا؟‘۔

ایم کیو ایم اراکین نے کہا کہ ’کراچی میں لاک ڈاؤن کی آڑ میں تاجروں کے ساتھ بہت زیادہ ناانصافی ہورہی ہے‘۔

مزید پڑھیں: ’72 گھنٹوں میں ہمارے مطالبات منظور نہ کئے گئے تو راست اقدام اٹھائیں گے‘

ایم کیو ایم کے رکن اسمبلی کنور نوید جمیل نے کہا کہ ’اسپیکرپر واضح کردیا کہ تاجروں کے مسائل حل ہونے تک اپنا احتجاج جاری رکھیں گے، سندھ حکومت کو کراچی والوں کو بھی شہری سمجھنا ہوگا،  یہ باہرسےکرپٹ افسران لاکرمحنت کشوں کی جیبیں خالی کراتے رہیں گے‘۔

کنور نوید جمیل نے سندھ حکومت سے متاثر تاجروں اور شہریوں کو ریلیف دینے کا مطالبہ بھی کیا۔

پاکستان پیپلزپارٹی کے رکن اسمبلی مکیش کمار نے کہا کہ ’کروناکے ساتھ اگر ایم کیوایم والے پانی کی قلت کے خلاف آواز اٹھاتے تو ہم اُن کی مکمل حمایت کرتے کیونکہ کرونا کاتدارک اور پانی کی قلت کا مسئلہ دونوں بہت اہم اور ضروری ہیں‘۔

یہ بھی پڑھیں: کراچی کے تاجروں‌ کا سندھ حکومت کو ایک ہفتے کا الٹی میٹم

مکیش کمار نے ایم کیو ایم کے رکن اسمبلی محمد حسین کو مخاطب کرتے ہوئے ماسک پہنے کی تجویز دی اور کہا کہ ’آپ لوگ کرونا کی بات تو کررہے ہیں مگر ایس او پیز فالو نہیں کررہے، ایم کیوایم والے پہلے ماسک پہنیں پھراحتجاج کریں‘۔ اسپیکر سندھ اسمبلی نے ایم کیوایم اراکین کے احتجاج پر اجلاس جمعہ تک ملتوی کردیا۔

Comments

یہ بھی پڑھیں