تازہ ترین

لڑکے اور لڑکی پر تشدد کا واقعہ، پانچواں ملزم بھی گرفتار

اسلام آباد میں لڑکے اور لڑکی پر تشدد کے واقعے میں پولیس نے کارروائی کرتے ہوئے پانچویں ملزم کو بھی گرفتار کرلیا۔

اے آر وائی نیوز کے مطابق پولیس نے لڑکے اور لڑکی پر تشدد کے واقعے میں ملوث پانچویں ملزم بلاول مروت کو اسلام آباد سے گرفتار کیا۔

پولیس کا کہنا ہے کہ پانچویں ملزم کی گرفتاری سے مزید اہم انکشافات سامنے آئیں گے، واضح رہے کہ گینگ کے سرغنہ عثمان مرزا سمیت 4 ملزمان پہلے ہی گرفتار ہیں۔

قبل ازیں ملزمان کی جانب سے متاثرہ لڑکی کو ویڈیوز کے ذریعے بلیک میل کرکے لاکھوں روپے بٹورنے کا انکشاف ہوا تھا۔

مزید پڑھیں: اسلام آباد: لڑکی اور لڑکے کو ہراساں کرنے کے کیس میں مزید اہم انکشافات

ذرائع کے مطابق عثمان مرزا گینگ نے متاثرہ لڑکی کو بلیک میل کرکے 13 لاکھ روپے وصول کیے، گینگ کے کارندے متاثرہ لڑکی سے الگ الگ بھتہ وصول کرتے رہے۔

ذرائع کا کہنا تھا کہ پولیس نے مقدمے میں بلیک میلنگ، بھتہ لینے کی دفعات شامل کرنے کا فیصلہ کیا ہے، پولیس افسران کا مقدمے میں مزید دفعات کے لیے وزارت قانون سے رابطہ کیا ہے۔

یہ پڑھیں: اسلام آباد میں جوڑے پر تشدد: وزیراعظم کی ہر پہلو سے کیس کی تفتیش آگے بڑھانے کی ہدایت

وزیراعظم عمران خان نے آئی جی اسلام آباد کو ہر پہلو سے تشدد کیس کی تفتیش آگے بڑھانے کی ہدایت کی ہے۔

اسلام آباد تشدد کیس میں ایس ایس پی انویسٹی گیشن نے بتایا تھا کہ متاثرہ جوڑے نے شادی کرلی، شادی کی تصدیق بیانات ریکارڈ کرانے کے دوران ہوئی۔

خیال رہے کہ سوشل میڈیا پر اسلام آباد کی ایک ویڈیو وائرل ہوئی تھی ، جس میں لڑکا اور لڑکی کو تشدد کا نشانہ بنایا گیا تھا، ویڈیو وائرل ہونے پر ڈپٹی کمشنر اسلام آباد نے نوٹس لیا تھا۔

Comments

- Advertisement -