راولپنڈی: سیکیورٹی فورسز نے کرم میں مزدوروں کے رہائی کے لیے آپریشن کیا، کامیاب آپریشن کے بعد 5 مزدور بازیاب کروالیے گئے۔
پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے کرم میں کامیاب آپریشن کے بعد 5 مزدور بازیاب کروالیے، کرم میں موبائل ٹاور پر کام کرنے والے 16 مزدور 26 جون کو اغوا کیے گئے تھے، 10 مزدوروں کو 27 جون کو بازیاب کروالیا گیا تھا۔
ترجمان پاک فوج کے مطابق مزدوروں کی بازیابی کے لیے مختلف جگہوں پر آپریشنز کیے گئے، 13 جولائی کو ہونے والے آپریشن میں تین دہشت گرد مارے گئے، آپریشن میں کیپٹن باسط اور سپاہی حضرت بلال شہید ہوئے تھے۔
مزید پڑھیں: سیکیورٹی فورسز کے آپریشن میں 3 دہشت گرد ہلاک، کیپٹن اور سپاہی شہید
آئی ایس پی آر کا کہنا ہے کہ سیکیورٹی فورسز کا دہشت گردوں کے خلاف آپریشن جاری ہے۔
ترجمان پاک فوج کا کہنا ہے کہ بے گناہ اور معصوم شہریوں کی سیکیورٹی کے لیے کوشاں ہیں، عوام نے دہشت گردی کے خلاف جنگ میں فورسز کا بھرپور ساتھ دیا۔
