بیجنگ: چین میں مقامی حکومتوں نے ستمبر میں بچوں کی اسکول واپسی پر اہلخانہ کی ویکسینیشن لازمی قرار دے دی۔
برطانوی خبررساں ادارے کی رپورٹ کے مطابق چین کے صوبے گوانگسی کی جانب سے نوٹس میں یہ کہا گیا ہے کہ جس نے ابھی تک ویکسین نہیں لگوائی وہ فوراً لگوالیں تاکہ آپ کے بچوں کو اسکول جانے میں کوئی پریشانی نہ پیش آئے۔
چین میں شہریوں کو یہ ہدایت بھی جاری کی گئی ہیں کہ وہ اسپتالوں اور سپر مارکیٹوں جیسے عوامی مقامات میں داخل ہونے کے لیے بھی کورونا ویکسنیشن لازمی کروائیں۔
گوانگسی صوبے کے بییلیو شہر میں جاری ایک نوٹس میں شہریوں سے کہا گیا ہے کہ ابھی تک جنہوں ںے ویکسین نہیں لگوائی وہ جلدی کریں اور بچوں کی اسکول واپسی کو متاثر ہونے سے بچائیں۔
شمالی صوبہ ہیبی پِیانگ یانگ میں 12 سے 17 سال کی عمر کے طلبا کو اس وقت تک اسکول جانے کی اجازت نہیں ہوگی جب تک وہ خود ویکسین نہیں لگواتے۔
مقامی حکومتوں کی جانب سے جولائی کے آخر تک شہریوں کو ویکسین لگوانا ضروری قرار دیا گیا ہے البتہ اس کےبعد حکام کی جانب سے سختی کی جائے گی۔
واضح رہے چین نے رواں سال کے آخر تک اپنے 64 فیصد شہریوں کو کورونا ویکسین لگانے کا ہدف مقرر کیا ہے۔
