لندن: برطانیہ کی جانب سے پاکستان کو ریڈ لسٹ میں رکھنے کے معاملے پر برطانوی رکن پارلیمنٹ ناز شاہ نے وزیر ٹرانسپورٹ کو فیصلے پر نظرثانی کے لیے خط لکھ دیا۔
اے آر وائی نیوز کے مطابق برطانوی رکن پارلیمنٹ ناز شاہ نے وزیر ٹرانسپورٹ کو لکھے گئے خط میں کہا کہ برطانوی حکومت پاکستان کو ریڈ لسٹ میں رکھنے کے فیصلے پر نظرثانی کرے۔
انہوں نے لکھا کہ بھارت کو انفیکشن ریٹ زیادہ ہونے کے باوجود ریڈ لسٹ سے نکال دیا گیا، پاکستان کا انفیکشن ریٹ کم ہونے کے باوجود ریڈ لسٹ میں رکھا جارہا ہے۔
ناز شاہ نے خط میں کہا کہ میں نے وزرا کو مارچ میں بھی خط لکھا تھا کہ معاملے پر سیاست نہ کریں، میری نشاندہی پر کوئی اقدامات نہیں کیے گئے۔
برطانوی رکن پارلیمنٹ نے کہا کہ حکومت کا موجودہ فیصلہ سیاسی زیادہ اور سائنسی کم ہے، میرے حلقہ انتخاب میں پاکستان کمیونٹی کی بڑی تعداد موجود ہے۔
ناز شاہ نے خط میں لکھا کہ حکومت فیصلے پر جلد سے جلد نظرثانی کرکے کمیونٹی کو ریلیف دے۔
خیال رہے کہ رواں سال اپریل میں عالمی وبا کورونا کے بڑھتے کیسز کے پیش نظر برطانیہ نے پاکستان کو سفری پابندیوں کی ریڈ لسٹ میں شامل کیا تھا۔
