لاہور: گریٹر اقبال پارک میں خاتون سے دست درازی کے واقعے میں پولیس نے گرفتار کیے گئے 71 سالہ بزرگ وزیر خان کو رہا کردیا۔
اے آر وائی نیوز کی خبر پر اعلیٰ حکام نے بزرگ شہری کی گرفتاری کا نوٹس لیا جس کے بعد پولیس نے گرفتار کیے گئے 71 سالہ بزرگ شہری وزیر خان کو رہا کیا۔
ذرائع کا کہنا ہے کہ وزیر خان کو تھانہ کوتوالی سی آئی اے سے رہا کیا گیا ہے۔
اے آر وائی نیوز نے وقوع کے وقت بزرگ کی گھر میں موجودگی کی خبر نشر کی تھی، پولیس کا کہنا تھا کہ بزرگ شہری کا نمبر جیو فیسنگ میں سامنے آیا تھا جس کے بعد گرفتاری عمل میں لائی گئی تھی۔
واضح رہے کہ اس سے قبل مینار پاکستان پر خاتون کے ساتھ پیش آئے بدسلوکی کے واقعے پر پولیس کی بے حسی کی دو سی سی ٹی وی فوٹیجز منظر عام پر آئی تھیں۔
مزید پڑھیں: مینار پاکستان واقعہ: بزرگ شہری کو گرفتار کرنے کی ویڈیو منظرعام پر آگئی
فوٹیج میں دیکھا جاسکتا ہے کہ 71 سالہ بزرگ وزیر خان کو شاہدرہ میں گھر کے باہر سے اٹھایا گیا، انویسٹی گیشن شاہدرہ پولیس نے بزرگ کو موٹر سائیکل پر بٹھایا۔
پولیس نے گزشتہ شام 5 بجکر 35 منٹ پر بزرگ شخص کو اٹھایا، دوسری فوٹیج میں 14 اگست کو وزیر خان کی گھر کے باہر موجودگی ثابت ہوگئی۔
ویڈیو میں 14 اگست کو شام 7 بجکر 10 منٹ پر بزرگ شہری وزیر خان کو گھر کے باہر دیکھا جاسکتا ہے انہیں شاہدرہ سے گرفتار کرکے تھانہ سی آئی اے کوتوالی میں بند کردیا گیا۔
