The news is by your side.

Advertisement

پاک نیوزی سیریز منسوخ ہونے پر بابر اعظم کا ردعمل آگیا

کراچی: نیوزی لینڈ کرکٹ ٹیم کی جانب سے سیکیورٹی خدشات کو جواز بنا کر اچانک دورہ پاکستان ختم کرنے پر کپتان بابر اعظم اور حسن علی کا ردعمل آگیا۔

تفصیلات کے مطابق قومی ٹیم کے کپتان بابر اعظم نے سماجی رابطے کی ویب سائٹ ٹویٹر پر لکھا کہ ’پاک نیوزی لینڈ سیریز منسوخ ہونے کا بہت افسوس ہوا، یہ سیریز کروڑوں پاکستانی مداحوں کے لیے خوشی لاسکتی تھی۔

انہوں نے کہا کہ ہمیں ہماری سیکیورٹی ایجنسیز کی قابلیت پر پورا بھروسہ ہے، ہماری سیکیورٹی ایجنسیز پاکستان کا فخر ہیں اور ہمیشہ رہیں گی۔

بابر اعظم نے آخر میں ’پاکستان زندہ باد‘ بھی لکھا۔

دوسری جانب قومی ٹیم کے فاسٹ بولر حسن علی کا کہنا ہے کہ سیریز منسوخ ہونا افسوسناک ہے یہ خبر ہمارے مداحوں کے لیے بھی پریشان کن ہے، میں بتانا چاہتا ہوں کہ ہمارا ملک کرکٹ کے لیے محفوظ ہے۔

حسن علی نے لکھا کہ مداحوں سے وعدہ کرتے ہیں کہ ہم ان اداس جذبات کو خوشیوں میں بدل دیں گے۔

واضح رہے کہ نیوزی لینڈ کرکٹ ٹیم نے سکیورٹی خدشات کو جواز بناکر پاکستان کا دورہ اچانک ختم کرنے کا اعلان کردیا جس کے بعد دونوں ٹیموں کے درمیان سیریز ملتوی کردی گئی ہے۔

خیال رہے کہ 18سال بعد نیوزی لینڈ کی ٹیم پاکستان میں سیریز کھیلنے کے لیے آئی تھی اور ٹیم کی آمد سے قبل نیوزی لینڈ کی سکیورٹی ٹیم نے بھی انتظامات پر اطمینان کا اظہار کیا تھا۔

پاکستان اور نیوزی لینڈ کے درمیان تین ون ڈے میچز راولپنڈی اور 5 ٹی ٹوئنٹی میچز لاہور میں کھیلے جانے تھے۔
خیال رہے کہ پاکستان آنے سے قبل نیوزی لینڈ کی ٹیم نے بنگلا دیش میں سیریز کھیلی ہے۔

Comments

یہ بھی پڑھیں