The news is by your side.

Advertisement

رضوان نے کیوی ٹیم کو ماضی یاد دلا دیا

راولپنڈی: قومی ٹیم کے وکٹ کیپر بیٹسمین محمد رضوان نے کیوی ٹیم کو ماضی یاد دلا دیا۔

تفصیلات کے مطابق نیوزی کرکٹ ٹیم کے دورہ پاکستان منسوخ کرنے پر قومی ٹیم کے وکٹ کیپر بیٹسمین محمد رضوان نے سماجی رابطے کی ویب سائٹ ٹویٹر پر لکھا کہ ’کرائسٹ چرچ حادثے کے بعد پاکستان نے نیوزی لینڈ کو مکمل سپورٹ کیا تھا۔‘

محمد رضوان نے لکھا کہ ’پاکستان نے نیوزی لینڈ کو کرائسٹ چرچ واقعے کے بعد سپورٹ کیا لیکن کیوی ٹیم نے سیکیورٹی کو جواز بنا کر پاکستان کا تاریخی دورہ منسوخ کردیا۔‘

انہوں نے لکھا کہ یہ بہت افسوسناک عمل ہے خاص طور پر جب پاکستان کی سیکیورٹی فورسز نے یقین دہانی کروائی تھی کہ سیریز میں کوئی خطرہ نہیں ہے۔

واضح رہے کہ نیوزی لینڈ کرکٹ ٹیم نے سکیورٹی خدشات کو جواز بناکر پاکستان کا دورہ اچانک ختم کرنے کا اعلان کردیا جس کے بعد دونوں ٹیموں کے درمیان سیریز ملتوی کردی گئی۔

خیال رہے کہ 18سال بعد نیوزی لینڈ کی ٹیم پاکستان میں سیریز کھیلنے کے لیے آئی تھی اور ٹیم کی آمد سے قبل نیوزی لینڈ کی سکیورٹی ٹیم نے بھی انتظامات پر اطمینان کا اظہار کیا تھا۔

پاکستان اور نیوزی لینڈ کے درمیان تین ون ڈے میچز راولپنڈی اور 5 ٹی ٹوئنٹی میچز لاہور میں کھیلے جانے تھے۔
یاد رہے کہ پاکستان آنے سے قبل نیوزی لینڈ کی ٹیم نے بنگلا دیش میں سیریز کھیلی ہے۔

Comments

یہ بھی پڑھیں