The news is by your side.

Advertisement

برٹش ایئرویز کے مسافر تاشقند میں‌ رُل گئے

اسلام آباد سے لندن جانے والی برٹش ایئرویز کی پرواز کی تاشقند میں مسافر کے انتقال کے باعث ایمرجنسی لینڈنگ کی گئی جس کے بعد طیارے میں خرابی پیدا ہوئی تو ایئرلائن نے مسافروں کو بے یارومددگار چھوڑ دیا۔

اے آر وائی نیوز کے مطابق اسلام آباد سے لندن جانے والی برٹش ایئرویز کی پرواز کی تاشقند میں ایمرجنسی لینڈنگ کی گئی، مسافر کے انتقال کے بعد طیارے میں فلنگ کے دوران خرابی پیدا ہوگئی۔

برٹش ایئرویز نے تاشقند ایئرپورٹ پر مسافروں کو بے یارو مددگار چھوڑ دیا جس کے باعث مسافر رُل گئے۔

برٹش ایئرویز کے متاثرہ مسافر چوہدری رضا نے اے آر وائی نیوز سے خصوصی گفتگو کرتے ہوئے کہا کہ مسافر 8 گھنٹے تک جہاز میں رہے، تین گھنٹے سے ایئرپورٹ پر بھی انتظار کررہے ہیں۔

مسافر نے کہا کہ ہمیں کہا گیا ہے دوسرا طیارہ آئے گا لیکن ہمیں مزید 13 گھنٹے انتظار کا کہا گیا ہے، بھوکے پیاسے ایئرپورٹ پر موجود ہیں۔

متاثرہ مسافر کا کہنا تھا کہ ہمارے درمیان بچے اور مریض بھی موجود ہیں۔

چوہدری رضا نے بتایا کہ تاشقند ایئرپورٹ پر زبان کا بھی مسئلہ ہے کوئی گفتگو سمجھ نہیں رہا، برٹش ایئرویز مسافروں پر کوئی توجہ نہیں دے رہی، بات کرنا تو دور برٹش ایئرویز والوں کا کچھ پتا ہی نہیں ہے۔

انہوں نے کہا کہ مقامی ایئرپورٹ اسٹاف انگلش میں بات تک نہیں کرسکتا، ہمیں ایئرپورٹ میں رکھا گیا ہے کھانے پینے کا کوئی انتظام نہیں ہے، مسافر پریشانی میں مبتلا ہیں۔

 

Comments

یہ بھی پڑھیں