کراچی کے علاقے گلستان جوہر میں ٹریفک پولیس کے رویے سے تنگ آکر ڈرائیور نے رکشے کو آگ لگادی۔
اے آر وائی نیوز کے مطابق کراچی کے علاقے گلستان جوہر منور چورنگی کے قریب رکشے ڈرائیور نے ٹریفک پولیس کی مبینہ رشوت مانگنے سے تنگ آکر اپنے رکشے کو آگ لگادی۔
واقعے کی ویڈیو منظرعام پر آگئی جس میں دیکھا جاسکتا ہے کہ آگ لگنے کے سبب رکشہ جل کر تباہ ہوگیا۔
رکشہ ڈرائیور کا کہنا تھا کہ ٹریفک پولیس اہلکار نے رشوت مانگی، رشوت نہ دینے پر بلا وجہ چالان کاٹ دیا گیا۔
رکشہ ڈرائیور کا کہنا تھا کہ کرایے پر رکشہ چلا رہا ہوں، رشوت کہاں سے دوں، اہلکار نے کہا کہ ہاں رکشے کو آگ لگا دو۔
یاد رہے کہ کچھ عرصہ قبل کراچی کے علاقے ناظم آباد میں غربت کے مارے رکشہ ڈرائیور نے سی این جی نہ ملنے پر رکشہ جلادیا تھا، پمپ سے پیٹرول خریدا اور کچھ دور جاکر رکشے پر چھڑکا اور آگ لگائی اور خودسوزی کی کوشش کی جسے شہریوں نے ناکام بنایا تھا۔
رکشہ ڈرائیور شاہد کا کہنا تھا کہ دو مہینے سے گھر کا کرایہ نہیں دیا مالک مکان گھر خالی کرنے کا کہہ رہا ہے بچوں کو تڑپتا نہیں دیکھ سکتا، شاہد کے پانچ میں سے تین بچے پراسرار بیماری میں مبتلا ہیں انہیں مغرب کے بعد کچھ نظر نہیں آتا تھا۔