The news is by your side.

Advertisement

وسیم اکرم کا سال نو پر ہوائی فائرنگ کرنے والوں کو پیغام

کراچی: قومی کرکٹ ٹیم کے سابق کپتان وسیم اکرم نے سال نو پر ہوائی فائرنگ کرنے والے عناصر کو آڑے ہاتھوں لیا ہے۔

تفصیلات کے مطابق سماجی رابطے کی ویب سائٹ ٹوئٹر پر لیجنڈ کپتان وسیم اکرم نے سال نو پر ہوائی فائرنگ کرنے والوں کیلئے پیغام دیا کہ میں ان تمام والدین سےدرخواست کرتا ہوں کہ وہ اپنےبچوں کو سمجھائیں کہ وہ شو آف کرنا بند کریں۔

وسیم اکرم نے اپنے ویڈیو پیغام میں کہا کہ رات کےبارہ بجے ایسے فائرنگ کرتے ہیں جیسے یہ خود ریمبو ہوں، سال نو کی خوشی پٹاخوں اور پھلجڑیوں سے بھی منائی جاسکتی ہے، اگر ہم اپنے ملک کی بہتری چاہتے ہیں تو تبدیلی کیلئے ہم سب کو مل کر کام کرنےکی ضرورت ہے۔

بعد ازاں اپنے ٹوئٹر پیغام میں وسیم اکرم نے لکھا کہ کراچی میں ایک بچہ اندھی گولی کا شکار ہوکر جاں بحق ہوگیا جبکہ 20 سے زائد افراد شدید زخمی ہیں، کیا ہر سال نو کے موقع پر ایسا ہوتا رہے گا، اگر ایسا ہے تو مجھے بتائیں کہ یہ مسکراتے چہرے کس لئے ہیں؟

یاد رہے کہ رات گئے کراچی کے علاقے اجمیر نگری میں اندھی گولی لگنے کے باعث ماں باپ کا اکلوتا بیٹا جاں بحق ہوا تھا، جس کی شناخت 11 سالہ علی رضا کے نام سے ہوئی تھی۔

Comments

یہ بھی پڑھیں