کراچی کے علاقے شرف آباد میں شہریوں نے ڈکیتی کی واردات ناکام بناتے ہوئے دو ڈاکو پکڑ لیے۔
اے آر وائی نیوز کے مطابق کراچی کے علاقے شرف آباد میں شہریوں نے دو ڈاکوؤں کو پکڑ کر تشدد کا نشانہ بنانے کے بعد پولیس کے حوالے کردیا۔
پولیس کا کہنا ہے کہ شہریوں کے تشدد سے دونوں ڈاکو شدید زخمی ہوگئے، شہری نے چھری لے کر واردات کرنے والے ڈاکو کی گردن زخمی کردی۔
پولیس کا بتانا ہے کہ ایک مبینہ ملزم فرار ہوگیا جبکہ زخمی ڈاکو کو گرفتار کرکے اسپتال منتقل کردیا گیا ہے۔
متاثرہ شہری کا کہنا ہے کہ میرے ساتھ ڈکیتی کی واردات ہورہی تھی ایک ڈاکو کے پاس اسلحہ اور دوسرے کے پاس چھری تھی، ایک شہری نے وارادت دیکھی تو ڈاکو سے چھری چھین کر اس کی گردن پر وار کیا۔
واضح رہے کہ گزشتہ ماہ کراچی کے علاقے شیرشاہ میں 16 سالہ میٹرک کے طالب علم کو ڈکیتی مزاحمت پر قتل کردیا گیا تھا۔
لواحقین کا کہنا تھا کہ مقتول 5بہن بھائیوں میں سب سے بڑا تھا، والد علاقے میں پان کی دکان چلاتے ہیں۔
پولیس حکام کا کہنا تھا کہ مقتول کا آبائی تعلق پنجاب سے تھا، مقتول طالبعلم کباڑ کے گودام میں مزدوری کرتا تھا۔
سلمان لودھی اے آر وائی نیوز کراچی کے کرائم رپورٹر ہیں۔