بڈاپسٹ: ہنگری میں دریائے ڈینیوب میں جنوبی کوریائی سیاحوں کی کشتی کو پیش آنے والے حادثے کے نتیجے میں 7 افراد ہلاک اور 21 لاپتا ہوگئے۔
غیرملکی خبررساں ادارے کے مطابق ہنگری کے دارالحکومت بڈاپسٹ میں دریائے ڈینیوب میں جنوبی کوریائی سیاحوں کی کشتی الٹ گئی جس کے نتیجے میں 7 افراد ہلاک اور 21 لاپتا ہیں۔
حکام نے 7 افراد کی ہلاکت کی تصدیق کرتے ہوئے بتایا کہ لاپتا سیاحوں کی تلاش کے لیے ریسکیو آپریشن جاری ہے۔
ہنگری کی نیشنل ایمبولینس سروس کے مطابق 7 افراد کو بچالیا گیا ہے، حادثے کے وقت اس کشتی میں 33 جنوبی کوریائی سیاح سوار تھے۔
مزید پڑھیں: انڈونیشیا میں کشتی ڈوبنے سے 8 افراد ہلاک
جنوبی کوریا کے صدر دفتر کی جانب سے کہا گیا ہے کہ صدر مون جے ان نے اس ریسکیو آپریشن میں ہنگری کی مدد کے لیے تمام ممکنہ وسائل مہیا کرنے کی ہدایت دی ہے۔
واضح رہے کہ گزشتہ سال جنوری میں انڈونیشیا کے جزیرے بورنو کے سمندر میں کشتی ڈوبنے سے کم از کم 8 افراد ہلاک جبکہ متعدد لاپتا ہوگئے تھے۔
خیال رہے کہ 25 اگست 2017 کو برازیل میں باہیا کے ساحلی شہر کے قریب کشتی الٹنے سے 22 افراد ہلاک جبکہ درجنوں لاپتہ ہوگئے تھے۔
