ہری پور: صوبہ خیبر پختونخواہ کے شہر ہری پور میں 7 سالہ بچے کو زیادتی کے بعد قتل کردیا گیا، پولیس نے 15 سالہ ملزم کو گرفتار کرلیا۔
تفصیلات کے مطابق خیبر پختونخواہ کے شہر ہری پور میں 7 سالہ عمر گزشتہ شام لاپتہ ہوا تھا جس کی لاش آج فجر کے وقت کھیتوں سے ملی۔ خیبر پختونخواہ حکومت اور پولیس نے بروقت کارروائی کرتے ہوئے قاتل کو گرفتار کرلیا۔
پولیس کا کہنا ہے کہ گرفتار ملزم مقتول کا پڑوسی ہے اور خود اس کی عمر بھی 13 سے 15 سال کے درمیان ہے۔
انسپکٹر جنرل (آئی جی) خیبر پختونخواہ محمد نعیم خان نے شفاف انکوائری کے لیے اعلیٰ سطح کی مشترکہ تحقیقاتی ٹیم (جے آئی ٹی) بنانے کا حکم دیا ہے۔ زیادتی کا شکار بچے کا خان پور تحصیل ہیڈ کوارٹر اسپتال میں پوسٹ مارٹم ہوا جس میں زیادتی کی تصدیق ہوگئی۔
ترجمان خیبر پختونخواہ حکومت اجمل وزیر نے اے آر وائی نیوز سے خصوصی گفتگو کرتے ہوئے کہا کہ وزیر اعلیٰ اور آئی جی نے واقعے کا نوٹس لیا جس کے بعد ملزم کو فوری گرفتار کیا گیا۔
اجمل وزیر کا کہنا تھا کہ ایسے درندوں کو معاف نہیں کیا جائے گا، سخت سزا ملے گی۔ واقعے سے متعلق کمیٹی بنا دی گئی ہے۔ بدقسمتی سے معاشرے میں گھناؤنا چہرہ سامنے آ رہا ہے۔
انہوں نے مزید کہا کہ ایسے واقعات کی روک تھام کے لیے اقدامات کیے جائیں گے، ’اس قسم کی درندگی ناقابل برداشت ہے‘۔
خیال رہے کہ چند روز قبل ہی صوبہ پنجاب کے شہر فیصل آباد میں بچوں سے زیادتی کرنے، تصاویر اور نازیبا ویڈیو بنانے والے ایک اور گروہ کا انکشاف ہوا تھا۔
فیصل آباد کے علاقے منصور آباد میں بچے کو نشہ آور مشروب پلا کر مبینہ طور پر اس کے ساتھ زیادتی کی گئی جبکہ ملزمان نے بچے کی تصاویر بھی وائرل کردی تھیں۔
