کراچی کے علاقے پی آئی بی کالونی میں گھر سے 16 سالہ لڑکی کی لاش برآمد ہوئی ہے۔
اے آر وائی نیوز کے مطابق کراچی کے علاقے پی آئی بی کالونی میں 16 سالہ فضا کو گلا گھونٹ کر قتل کیا گیا، پولیس نے واقعے کی تحقیقات کا آغاز کردیا۔
فضا کی بہن نے بتایا کہ چھ بہن بھائیوں میں تین شادی شدہ ہیں، گھر میں تین بہنیں اور والدہ رہتی ہیں ایک بہن کالج ایک اسکول میں پڑھتی ہیں۔
مقتولہ کی بہن کے مطابق واقعے کے بعد والدہ گھر سے باہر گئی ہوئی تھیں جب واپس آئیں تو گھر کا نقشہ بگڑا ہوا دیکھا، زیور، پچاس ہزار روپے سمیت ہر قیمتی چیز غائب تھی۔
پولیس کے مطابق خاتون کو گلا دبا کر قتل کیا گیا ہے، ڈکیتی کے شواہد نہیں ملے ہیں۔
واضح رہے کہ پولیس نے ابتدا میں خاتون کی ہلاکت کو ڈکیتی کے دوران تشدد کا نتیجہ بتایا تھا۔
