راولپنڈی: آرمی چیف جنرل سید عاصم منیر کا کہنا ہے کہ دہشت گردوں، سرپرستوں اور ان کے سہولت کاروں کو بخشا نہیں جائے گا۔
پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل سید عاصم منیر نے کوئٹہ کا دورہ کیا اس موقع پر وزیراعلیٰ بلوچستان اور کور کمانڈر بلوچستان نے ان کا استقبال کیا، انہیں مستونگ، ژوب حملوں پر بریفنگ دی گئی جس میں وفاقی وزیر داخلہ ، وزیر اعلیٰ بلوچستان، صوبائی وزرا، سول و عسکری حکام نے شرکت کی۔
آئی ایس پی آر کے مطابق آرمی چیف نے شہدا کو خراج عقیدت پیش کیا اور سی ایم ایچ کوئٹہ کا دورہ کیا، مستونگ واقعے کے زخمیوں، اہلخانہ سے ملاقات کی۔
آرمی چیف نے بلوچستان پولیس، قانون نافذ کرنے والے اداروں کے اہلکاروں کی بہادری کو سراہا اور شہدا کے اہلخانہ کو مکمل تعاون، حمایت کا یقین دلایا۔
پاک فوج کے سپہ سالار نے کہا کہ 12 ربیع الاول کو دہشت گردی جیسے واقعات خوارج کے مذموم عزائم ظاہر کرتے ہیں، اس دہشت گردی کو بیرونی ریاستی سرپرستوں کی پشت پناہی حاصل ہے۔
انہوں نے کہا کہ دہشت گرد اور ان کے سہولت کاروں کا مذہب، نظریے سے کوئی تعلق نہیں، یہ پاکستان اور عوام کے دشمن ہیں، بدی کی طاقتیں ریاست، سیکیورٹی فورسز کی بھرپور طاقت کا سامنا کرتی رہیں گی۔
آرمی چیف نے کہا کہ ریاست، سیکیورٹی فورسز کو ایک مضبوط قوم کی حمایت حاصل ہے، دہشت گردوں کے خلاف آپریشن بلا تعطل جاری رہے گا، اس وقت تک آرام سے نہیں بیٹھیں گے جب تک دہشت گردی کی لعنت کو جڑ سے اکھاڑ پھینکا نہیں جاتا۔
انہوں نے کہا کہ عوام نے دہشت گردوں کے نظریے، پشت پناہوں کے پروپیگنڈے کو مسترد کردیا ہے، پاکستانی عوام، امن، معاشی ترقی، انسانی ترقی کے لیے پوری طرح پرعزم ہیں۔
