اسلام آباد: آرمی چیف جنرل عاصم منیر نے ملک کی اقتصادی بحالی کیلیے پاک فوج کی غیر متزلزل حمایت کا اعادہ کیا۔
نگراں وزیر اعظم انوار الحق کاکڑ کی زیرِ صدارت خصوصی سرمایہ کاری سہولت کونسل کی ایپکس کمیٹی کا پانچواں اجلاس ہوا جس میں آرمی چیف، نگراں وفاقی کابینہ کے ارکان، وزرائے اعلیٰ اور متعلقہ اعلیٰ سول و عسکری حکام نے شرکت کی۔
اعلامیے کے مطابق اجلاس میں وزارت خارجہ، داخلہ، انفارمیشن ٹیکنالوجی و ٹیلی کمیونیکیشن، نیشنل فوڈ سکیورٹی اینڈ ریسرچ اور آبی وسائل کی جانب سے ملک میں کاروبار اور سرمایہ کاری کے ماحول کو بہتر بنانے کے حوالے سے بریفنگ دی گئی۔
اجلاس میں متعلقہ وزارتوں نے بڑے چیلنجوں پر قابو پانے کیلیے ٹائم لائنز اور حل کا احاطہ کرتے ہوئے جامع منصوبے پیش کیے۔
کمیٹی نے متفقہ طور پر اس بات کا اعادہ کیا کہ تمام فیصلے ملک کے وسیع تر مفاد میں کیے جائیں گے، اسمگلنگ اور ذخیرہ اندوزی کی لعنت سے آہنی ہاتھوں سے نمٹا جائے گا۔
وزیر اعظم نے وزارتوں کو ہدایت کی کہ وہ کم عرصے میں عوام کی بہبود اور معاشی استحکام کیلیے اپنا کردار ادا کریں اور وسط مدتی اور طویل المیعاد پالیسیاں بھی بنائیں۔
اجلاس میں آرمی چیف جنرل عاصم منیر نے ملک کی اقتصادی بحالی کے اس بڑے منصوبے کیلیے حکومت کی جاری کوششوں کیلیے پاک فوج کی غیر متزلزل حمایت کا اعادہ کیا۔
