کینٹکی: امریکی ریاست کینٹکی میں سیلاب سے 8 افراد ہلاک ہو گئے، جب کہ مزید ہلاکتوں کا خدشہ ہے۔
تفصیلات کے مطابق مشرقی کینٹکی میں شدید بارش کے بعد سیلابی صورت حال پیدا ہو گئی ہے، اس دوران مختلف حادثات میں 8 افراد ہلاک ہو گئے ہیں۔
کینٹکی کے گورنر نے ریاست میں ایمرجنسی نافذ کر دی، شاہراہیں تالاب بنی ہوئی ہیں، ریاست کی ناٹ کاؤنٹی کا مرکزی علاقہ سیلاب سے سب سے زیادہ متاثرہوا۔
متاثرہ علاقوں میں گاڑیاں، گھر اور عمارتیں کئی فٹ پانی میں ڈوبی ہوئی ہیں، اور سیکڑوں افراد نقل مکانی کر چکے ہیں، ادھر نیشنل ویدر سروس نے مزید بارش کی پیش گوئی بھی کی ہے۔
گورنر اینڈی بیشیر نے جمعرات کو خبردار کیا کہ پانی میں مسلسل اضافے کے باعث ہلاکتوں کی تعداد دوہرے ہندسے تک پہنچنے کا خدشہ ہے۔
The floodwaters are devastating in Eastern Kentucky, and it is going to get worse over the next few days.
Praying for our loved ones in the path of the flood. We will do all we can to help.pic.twitter.com/v0uKtW3YTX
— Charles Booker (@Booker4KY) July 28, 2022
گورنر نے جمعرات کو 6 کاؤنٹیوں میں ہنگامی حالت کے نفاذ کا اعلان کرتے ہوئے کہا کہ طوفانوں کے ایک سلسلے نے ریاست کے مشرقی حصے کو ڈبو دیا ہے، جہاں بارشوں کا سلسلہ بدستور جاری ہے، ہونے والے نقصانات اتنے زیادہ ہیں کہ بحالی میں برسوں لگ سکتے ہیں۔
گورنر بیشیر نے سیلاب کو کینٹکی کی تاریخ کا بدترین سیلاب قرار دے دیا، انھوں نے دکھی دل سے کہا کہ سیلاب کی وجہ سے سیکڑوں لوگوں کا اپنے گھروں سے محروم ہونے کا خطرہ ہے۔
واضح رہے کہ مرنے والوں میں ایک 81 سالہ خاتون بھی شامل ہے، مقامی حکام کا کہنا ہے کہ متعدد افراد لا پتا ہیں، اور جمعرات کی رات تک صحیح اعداد و شمار بھی معلوم نہیں ہو سکے تھے۔