روم: گزشتہ چوبیس گھنٹوں کے دوران اٹلی، بیلجیئم اور برطانیہ میں ہونے والی اموات کی تعداد نے دنیا بھر کے لیے خطرے کی گھنٹی بجا دی ہے۔
تفصیلات کے مطابق یورپ، برطانیہ اور امریکا میں کرونا وائرس کے پھیلاؤ کے ساتھ ساتھ اموات کی شرح بھی خطرناک تیزی سے بڑھتی جا رہی ہے، اٹلی، بیلجیئم اور برطانیہ میں 24 گھنٹوں میں مجموعی طور پر 1410 اموات واقع ہو گئی ہیں۔
غیر ملکی میڈیا رپورٹس کے مطابق اٹلی میں کرونا وائرس کے باعث اموات 12 ہزار 428 ہو گئی ہیں، صرف گزشتہ 24 گھنٹوں میں 837 افراد جان سے گئے، جب کہ اب تک ایک لاکھ سے زائد افراد وائرس سے متاثر ہو چکے ہیں۔ اطالوی حکومت نے کرونا وائرس سے متاثر سیزنل و ایگریکلچر ورکرز کی امداد کا اعلان کر دیا ہے، بے روزگار ہونے والے ان ملازمین کو 600 یورو دیے جائیں گے، آمدن کے ذرایع نہ ہونے والے خاندانوں کو بھی 300 یورو ملیں گے۔
کرونا وائرس نے دنیا بھر میں 42 ہزار جانیں نگل لیں
بیلجیئم میں کرونا وائرس سے گزشتہ 24 گھنٹوں میں 192 افراد جان سے گئے جس کے بعد مجموعی اموات کی تعداد 705 ہو گئی، وزارت صحت کا کہنا ہے کہ کرونا وائرس کے نئے کیسز کی تعداد 876 ہے، برسلز میں 146 اولڈ نرسنگ ہومز میں سے ایک تہائی وائرس سے متاثر ہیں۔
برطانیہ میں کرونا وائرس سے گزشتہ 24 گھنٹوں میں 381 اموات واقع ہو چکی ہیں، جس کے بعد ہلاکتوں کی تعداد ایک ہزار 789 تک پہنچ گئی، جب کہ25 ہزار سے زائد افراد متاثر ہو چکے ہیں، کنگز کالج اسپتال کا 13 سالہ نوجوان بھی ہلاک ہونے والوں میں شامل ہے۔ دوسری جنگ عظیم میں بچ جانے والا سپاہی 97 سالہ ہیرالڈ پئیرسن بھی جان سے گیا۔ برطانوی وزیر اعظم بورس جانسن نے ویڈیو لنک پر کابینہ اجلاس میں برطانیہ میں غیر ملکی میڈیکل اسٹاف کے ویزے ایک سال کے لیے بڑھانے کا اعلان کر دیا۔
