تازہ ترین

میلسی میں وین نہر میں ڈوبنے سے 11 افراد جاں بحق

میلسی: پنجاب کے شہر میلسی میں وین نہر میں ڈوب گئی، حادثے میں 11 افراد جاں بحق ہو گئے۔

اے آر وائی نیوز کے مطابق میلسی لنک کینال میں ایک وین ڈوب گئی، جس میں 11 افراد سوار تھے، ریسکیو ٹیم نے کئی گھنٹوں کی تلاش کے بعد جاں بحق افراد کی لاشیں نکال لیں۔

خانیوال کی نہر میں وین دو روز قبل گری تھی، جو گزشتہ رات میلسی لنک کینال سے مل گئی، وین کو نہر سے نکال لیا گیا ہے، ریسکیو ٹیم کو نو افراد کی لاشیں ملی تھیں جب کہ دو افراد کی لاشوں کو بہت تلاش کے بعد ڈھونڈا گیا۔

چوبارہ کے رہایشی دو بھائی اعجاز اور صفدر بیوی بچوں کے ہمراہ شیخوپورہ سے میاں چنوں آ رہے تھے کہ ان کی گاڑی نہر میں جا گری، بدقسمت خاندان اپنے عزیز کے انتقال پر شیخوپورہ گیا تھا، جاں بحق افراد میں 4 خواتین اور 4 بچے بھی شامل ہیں۔

میسلی کینال میں ڈوبنے والی وین

قبل ازیں، وین کی گم شدگی پر ریسکیو 1122 نے گاڑی کے نہر کے اندر گہرائی میں موجود ہونے کا شبہ ظاہر کیا تھا، کئی گھنٹوں کے ریسیکو آپریشن کے بعد آخر کار میلسی لنک کینال سے گاڑی مل گئی، حادثے کی خبر پر مقامی اعلیٰ انتظامیہ بھی موقع پر پہنچ گئی تھی۔

پنجاب: وین نہر میں گرنے سے 6 افراد ڈوب گئے

ڈی سی خانیوال کا کہنا تھا کہ ریسکیو آپریشن کے لیے میلسی لنک کینال کو بند کروایا گیا، لاپتا ہونے والے افراد کی تلاش کے دوران ان میں سے چند کی موبائل لوکیشن حویلی کورنگا تھانہ کی حدود میں ٹریس ہوئی تھی۔ گاڑی میں سوار بدقسمت خاندان نے میاں چنوں میں اپنے رشتہ داروں سے حادثے سے کچھ دیر قبل فون پر رابطہ بھی کیا تھا، کچھ دیر بعد جب رشتہ داروں نے دوبارہ رابطہ کیا تو سب کے نمبر بند آئے۔

Comments

- Advertisement -