کراچی: صوبہ سندھ میں کرونا وائرس کی ڈیوٹی کرنے والے ڈاکٹرز اور پیرا میڈیکل اسٹاف کے لیے ہیلتھ الاؤنس جاری کرنے کا حکم، جب تک کرونا کی وبا موجود رہے گی الاؤنس جاری رہے گا۔
تفصیلات کے مطابق سندھ میں کرونا وائرس کی ڈیوٹی کرنے والے ڈاکٹرز اور پیرا میڈیکل اسٹاف کے لیے ہیلتھ الاؤنس جاری کرنے کا حکم دے دیا گیا، حکم نامہ محکمہ خزانہ سندھ نے جاری کیا۔
حکم نامے میں کہا گیا ہے کہ ہیلتھ الاؤنس یکم جولائی 2020 سے دیا جائے گا، جب تک کرونا کی وبا موجود رہے گی الاؤنس جاری رہے گا۔
محکمہ خزانہ کے مطابق گریڈ 17 سے زائد کے لیے 35 ہزار روپے ہر ماہ ادا کیے جائیں گے، گریڈ ایک سے سولہ تک کے لیے 17 ہزار اور پی جی اسٹوڈنٹس کو 15 ہزار روپے ادا کیے جائیں گے۔
محکمہ خزانہ کے حکم نامے کے مطابق ہاؤس جاب افسر کو 10 ہزار روپے جبکہ نرسنگ اسٹوڈنٹس کو 5 ہزار ماہانہ دیے جائیں گے۔
دوسری جانب ملک بھر میں کرونا وائرس کے وار جاری ہیں، مجموعی طور میں ملک میں اب تک 5 لاکھ 14 ہزار 338 کیسز سامنے آچکے ہیں جن میں سے 34 ہزار 169 فعال کیسز ہیں۔
کرونا وائرس کے باعث اب تک 10 ہزار 863 اموات ہوچکی ہیں جبکہ 4 لاکھ 69 ہزار 306 مریض صحت یاب ہوچکے ہیں۔