قومی ٹیم کے فاسٹ بولر شاہین آفریدی نے بنگلہ دیشی بیٹر کی وکٹ اپنے نومولود بیٹے کے نام کردی۔
راولپنڈی میں پاکستان اور بنگلہ دیش کے درمیان پہلا ٹیسٹ جاری ہے، مہمان ٹیم اپنی پہلی اننگز میں 565 رنز بنا کر آؤٹ ہوئی اور پاکستان کے خلاف 117 رنز کی برتری حاصل کرلی، پاکستانی ٹیم 6 وکٹوں کے نقصان پر 448 رنز اسکور کیے تھے اور اننگز ڈیکلیئر کردی تھی۔
بنگلہ دیش کی جانب سے وکٹ کیپر بیٹر مشفیق الرحیم نے شاندار 191 رنز کی اننگز کھیلی، شادمان اسلام نے 93، مہدی حسن نے 77 رنز اسکور کیے۔
پاکستان کی جانب سے نسیم شاہ نے تین کھلاڑیوں کو پویلین کی راہ دکھائی، شاہین آفریدی، خرم شہزاد اور محمد علی نے دو، دو وکٹیں حاصل کیں۔
تاہم بنگلہ دیش نے 7 وکٹوں کے نقصان پر 534 رنز بنائے تھے جب شاہین آفریدی نے فاسٹ بولر حسن محمود کی وکٹ حاصل کی اور جشن مناتے ہوئے یہ وکٹ نومولود بیٹے کے نام کی۔
View this post on Instagram
ویڈیو میں دیکھا جاسکتا ہے کہ شاہین جشن مناتے ہوئے بیٹے کو گود میں لینے کا اشارہ کررہے ہیں۔
واضح رہے کہ شاہین شاہ آفریدی کے ہاں پہلے بچے کی پیدائش ہوئی ہے، جس پر وہ خوشی سے نہال ہیں، جبکہ انہوں نے اپنے بیٹے کا نام ”علی یار” رکھا ہے۔
سابق کپتان شاہد آفریدی بھی خبر ملنے کے بعد خوشی سے سرشار ہیں کیونکہ وہ بھی نانا بن گئے ہیں۔
