نیو یارک : وزیراعظم شہباز شریف نے کہا ہے کہ اسرائیل کی غزہ میں ظلم اور نسل کشی کی شدید مذمت کرتے ہیں، ہمارے دل فلسطینی بھائی، بہنوں کے ساتھ دھڑکتے ہیں۔
یہ بات انہوں نے نیو یارک میں فلسطینی صدر محمود عباس سے ملاقات کے موقع پر کہی ان کے ہمراہ طارق فاطمی، عطا تارڑ اور خالد مقبول صدیقی بھی تھے۔
شہبازشریف نے کہا کہ میں یہاں پاکستانیوں کے جذبات پہنچانے آیا ہوں، اسرائیل کی غزہ میں ظلم اور نسل کشی کی شدید مذمت کرتے ہیں، ہمارے دل فلسطینی بھائی، بہنوں کے ساتھ دھڑکتے ہیں۔
انہوں نے کہا کہ گزشتہ ایک سال کے دوران غزہ جنگ میں 41 ہزار فلسطینی شہید ہوچکے ہیں، اس جنگ میں بچے بڑے بزرگ مائیں بہنیں شہید ہوئیں۔
وزیراعظم کا کہنا تھا کہ اسرائیل کے غزہ پر دہشت گرد حملے کی حالیہ تاریخ میں مثال نہیں ملتی، ہم غزہ میں فوری جنگ بندی اور فلسطینی ریاست کے قیام کا مطالبہ کرتے ہیں۔
شہباز شریف نے کہا کہ فلسطینی ریاست جلد قائم ہوگی اور وہ وقت جلدی آئے گا جب ہم مل کر بیٹھیں گے، فلسطینی بھائیوں اور بہنوں کی قربانی اور بہادری رائیگاں نہیں جائیں گی۔
فلسطینی صدر کی اے آر وائی نیوز سے خصوصی گفتگو
نیو یارک میں وزیراعظم شہباز شریف اور فلسطینی صدر کے درمیان ملاقات کے بعد محمود عباس نے اے آر وائی نیوز سے خصوصی گفتگو کی۔
نمائندہ اے آر وائی نیوز سے بات کرتے ہوئے فلسطینی صدر نے کہا کہ سال1948 سے لے کر آج تک پاکستان نے فلسطین کی بھرپور حمایت کی ہے، پاکستانیوں نے ہمیشہ فلسطینیوں کا ساتھ دیا۔
