پٹنہ: بھارتی ریاست بہار کے دو اضلاع بیتیا اور نوادہ میں زہریلا کھانا کھانے سے کم از کم 81 افراد اسپتال پہنچ گئے۔
بھارتی میڈیا کے مطابق ضلع نوادہ کے گاؤں مہولی کے ایک چائلڈ کیئر (آنگن واڑی) سینٹر میں زہریلی کھچڑی کھانے کے سبب 2 سے 5 سال کی عمر کے 11 بچے اور ایک خاتون کی طبیعت خراب ہو گئی، جنھیں فوری طور پر اسپتال پہنچایا گیا۔
نوادہ کے مرکزی اسپتال کے ڈپٹی سپرنٹنڈنٹ ڈاکٹر اجے کمار کے مطابق یہ واقعہ مرکز میں دوپہر کے کھانے کے دوران پیش آیا، جہاں بچوں کے لیے کھچڑی (چاول اور دال کی ڈش) تیار کی گئی تھی۔
ڈاکٹر اجے کمار کے مطابق تمام افراد کو طبی امداد فراہم کی گئی اور پھر انھیں گھر بھیجا گیا، تحقیقات پر پتا چلا کہ کھچڑی میں ایک مردہ چھپکلی ملی تھی، جس کی وجہ سے کھانا زہریلا ہو گیا تھا۔
ایک اور واقعے میں مغربی چمپارن کے علاقے بیتیا میں واقع انجینئرنگ کالج میں تقریباً 70 طلبہ بیمار ہو کر اسپتال پہنچ گئے، معلوم ہوا کہ انھیں بھی جو کھانا پیش کیا گیا تھا اس میں ایک مردہ چھپکلی پائی گئی۔
انجینئرنگ کے ایک طالب علم امیت کمار نے میڈیا کو بتایا کہ وہ جمعہ کی رات بوائز ہاسٹل میس میں کھانے کے لیے گئے تھے، جہاں مینو میں چکن اور چاول تھے، جب وہ کھانا کھا رہے تھے تو ایک طالب علم کو اپنی پلیٹ میں ایک مردہ چھپکلی ملی۔ ایک طالب علم نے کہا کہ اس رات تقریباً ڈیڑھ سو طلبہ نے کھانا کھایا تھا۔
کھانا کھانے کے بعد بہت سے طلبہ کو الٹیاں شروع ہو گئیں، کچھ طلبہ سر اور پیٹ میں درد کی شکایت کرنے لگے، اور ستّر سے زائد طلبہ کو اسپتال لے جایا گیا۔
ان واقعات سے ریاست بہار کے سرکاری اداروں میں فوڈ سیفٹی کے طریقوں پر تشویش پیدا ہو گئی ہے۔ طلبہ نے ہاسٹل میس میں کیٹرنگ کے عملے کے حفظان صحت کے معیارات پر بھی تشویش کیا اظہار کیا۔
