بھارتی سپراسٹار بیٹر ویرات کوہلی کا ہم شکل بھارت اور بنگلہ دیش کے درمیان ہونے والا دوسرا ٹیسٹ میچ دیکھنے پہنچ گیا۔
شدید بارش کے باعث گرین پارک اسٹیڈیم میں بھارت اور بنگلہ دیش کے درمیان ہونے والے ٹیسٹ میچ کا تیسرا دن بھی منسوخ کرنا پڑا، تاہم اسٹیڈیم میں شائقین کا ہجوم جمع ہوگیا، شائقین نے روہت کے مداح دیپک اور دھونی کے مداح رامبابو کے ساتھ رقص بھی کیا۔
میچ دیکھنے کے لیے ویرات کوہلی کا ہم شکل بھی گرین پارک اسٹیڈیم پہنچا، کرن کوشل نامی شخص کو دیکھتے ہی کچھ انھیں کوہلی سمجھ بیٹھے جبکہ تماشائیو کی اکثریت کوہلی کے ہم شکل کے ساتھ سیلفی بناتی نظر آئی۔
کرن کوشل گڑگاؤں کے رہائشی ہیں اور وہ میچ دیکھنے کانپور پہنچے، انھیں دیکھنے کے بعد پورے اسٹیڈیم میں ہر طرف صرف ویرات کوہلی کے نعرے گونج اٹھے۔
کوہلی کے ہم شکل کرن کو دیکھنے کے بعد لوگ ان کے ساتھ فوٹو بنواتے ہوئے بہت خوش نظر آئے، کرن بھی مداحوں کے ساتھ خندہ پیشانی سے تصویر بنواتے نظر آئے۔
بھارت اور بنگلہ دیش کے درمیان ٹیسٹ میچ کا تیسرا دن بھی ضائع ہونے کے بعد شکوک و شبہات زور پکڑ گئے ہیں کہ چوتھے اور پانچویں روز کھیل ممکن ہوگا یہ میچ ایسے ہی واش آؤٹ ہوجائے گا۔
