اسلام آباد: بانی پی ٹی آئی کی اہلیہ بشریٰ بی بی کے خلاف مقدمہ درج کرانے والا خود کرمنل ریکارڈ یافتہ نکلا۔
تفصیلات کے مطابق بشریٰ بی بی کے خلاف مقدمہ درج کرانے والے مدعی غلام یاسین کے خلاف بھی مختلف تھانوں میں مقدمات درج ہونے کا انکشاف ہوا ہے۔
غلام یاسین ایک مقدمے میں سزا یافتہ ہے، کچھ میں گواہ اور مدعی بھی رہا ہے، دل چسپ امر یہ ہے کہ جس تھانے میں اس نے بشریٰ بی بی کے خلاف مقدمہ کرایا اسی تھانے میں وہ ملزم رہا، جب کہ تھانہ درخواست جمال کے مقدمے میں اسے سزا بھی ہو چکی ہے۔
غلام یاسین تھانہ کوٹ چٹھہ میں ایک اور مقدمےمیں بھی گرفتار ہو چکا ہے، جب کہ 4 مقدمات میں مدعی اور کچھ مقدمات میں گواہ رہا ہے۔
واضح رہے کہ سعودی حکومت کے حوالے سے ویڈیو بیان پر پنجاب میں بانی پی ٹی آئی کی اہلیہ بشریٰ بی بی کے خلاف ایک ساتھ 3 مقدمات درج کر لیے گئے ہیں۔ لیہ، گوجرانوالہ اور ملتان میں مقدمات درج ہونے کے بعد ان کے خلاف مقدمات کی تعداد 5 ہو گئی ہے۔
ویڈیو بیان : بشریٰ بی بی کے خلاف ایک ساتھ 3 مقدمات درج
ان مقدمات میں ٹیلی گراف ایکٹ 1885، پیکا ایکٹ 2016، مسلمانوں کے جذبات مجروح کرنے کی دفعات شامل کی گئی ہیں۔ لیہ میں مقدمہ محلہ عید گاہ کے رہائشی اشفاق سہیل کی مدعیت میں، جب کہ گوجرانوالہ میں تھانہ صدر اور تھانہ قطب پور ملتان میں مقدمہ درج ہوا۔
