واشنگٹن: امریکا کے نو منتخب صدر ڈونلڈ ٹرمپ کو ’ڈے لائٹ سیونگ‘ فارمولا پسند نہیں ہے، انھوں نے اس کی مخالفت کر دی۔
غیر ملکی میڈیا رپورٹس کے مطابق نومنتخب امریکی صدر ڈونلد ٹرمپ نے ڈے لائٹ سیونگ فارمولے کی مخالفت کر دی ہے، ٹرمپ نے کہا ڈے لائٹ سیونگ امریکی شہریوں کے لیے ناگوار اور مہنگا پروجیکٹ ہے۔
جمعہ کو ایک سوشل میڈیا پوسٹ میں ٹرمپ نے کہا کہ یہ ایک بے کار پریکٹس ہے، ریپبلکن پارٹی اسے ختم کرنے کے لیے پوری کوششں کرے گی، ڈے لائٹ سیونگ ٹائم تکلیف دہ اور قوم کے لیے بہت مہنگا ہے۔
واضح رہے کہ امریکا کی زیادہ تر ریاستیں دن کی روشنی کا بہتر استعمال کرنے کے لیے مارچ میں گھڑیاں ایک گھنٹہ آگے کر دیتی ہیں، جب کہ نومبر میں انھیں دوبارہ پیچھے کر دیا جاتا ہے۔
ڈونلڈ ٹرمپ 20 جنوری کو اپنے عہدے کا حلف اٹھانے والے ہیں، اور ان کی آنے والی انتظامیہ میں کئی ایسے ارکان شامل ہیں جو دن کی روشنی میں وقت بچانے کی کھل کر مخالفت کرتے ہیں۔
روس نے فرار کے وقت بشار الاسد کے طیارے کو حملے سے بچانے کے لیے کیا کیا؟
فلوریڈا کے سینیٹر مارکو روبیو نے کانگریس میں ’کلاک سوئچنگ‘ پریکٹس کو ختم کرنے کے لیے متعدد بار دباؤ ڈالا ہے، 2022 میں انھوں نے ’سن شائن پروٹیکشن ایکٹ‘ نامی ایک بل سینیٹ میں پیش کیا تھا جو منظور ہوا لیکن ایوان نمائندگان میں اسے مسترد کر دیا گیا تھا، روبیو ٹرمپ کے سیکریٹری آف اسٹیٹ منتخب ہوئے ہیں، انھوں نے دن کی روشنی میں وقت کی بچت کو ’احمقانہ عمل‘ قرار دیا ہے۔
