واشنگٹن: امریکی ریاست کنساس کے بار میں فائرنگ کے نتیجے میں 4 افراد ہلاک اور 5 زخمی ہوگئے۔
غیرملکی خبررساں ادارے کے مطابق امریکی ریاست کنساس ٹیکیولا کے سی بار میں گھس کر نامعلوم مسلح شخص نے اندھا دھند فائرنگ کردی جس کے نتیجے میں 4 افراد ہلاک اور 5 زخمی ہوگئے۔
رپورٹ کے مطابق ٹیکیولا بار میں فائرنگ کرنے والا نامعلوم مسلح شخص فرار ہونے میں کامیاب ہوگیا، پولیس نے سی سی ٹی وی فوٹیج کی مدد سے ملزم کی تلاش شروع کردی ہے۔
فائرنگ کے نتیجے میں ہلاک اور زخمیوں کو اسپتال منتقل کردیا گیا ہے جہاں زخمیوں کو طبی امداد فراہم کی جارہی ہے۔
مزید پڑھیں: امریکا میں فائرنگ کا واقعہ، مرنے والوں کی تعداد 7 ہوگئی
پولیس کے مطابق فائرنگ میں ہلاک ہونے والے افراد کی شناخت نہیں ہوسکی ہے جبکہ فائرنگ کی وجوہات بھی سامنے نہیں آسکی ہیں۔
پولیس نے جائے وقوعہ سے گولیوں کے خول اکٹھے کرکے تحقیقات کا آغاز کردیا ہے تاہم یہ واضح نہیں ہوسکا ہے حملہ آوروں کی تعداد کتنی تھی۔
واضح رہے کہ گزشتہ ماہ امریکی ریاست ٹیکساس میں فائرنگ کے واقعے میں 7 افراد ہلاک اور سترہ ماہ کی بچی سمیت 22 افراد زخمی ہوگئے تھے۔
یاد رہے کہ 4 اگست کو امریکی ریاست ٹیکساس کے شہر ایل پاسو کے سیلو وسٹا شاپنگ مال میں فائرنگ کے نتیجے میں 22 افراد ہلاک جبکہ 40 زخمی ہوگئے تھے پولیس نے فائرنگ میں ملوث ایک سفید فام لڑکے پیٹرک کو گرفتار کیا تھا۔
