اوٹاوا: کینیڈا میں ایک ایسی لڑکی منظر عام پر آئی جس کے سانس لینے سے میوزک کی آوازیں آنے لگیں، یہ ماجرا کیا ہے؟ آپ بھی جان کر حیران رہ جائیں گے۔
غیرملکی خبررساں ادارے کی رپورٹ کے مطابق کینیڈا کے صوبے انٹاریو میں حیرت انگیز اور مضحکہ خیز واقعہ پیش آیا جہاں ایک لڑکی ہارمونیکا بچاتے ہوئے میوزیکل آلہ اپنے منہ میں ہی پھنسا بیٹھی۔
آپ نے ایسے مناظر ڈراموں اور فلموں میں ہی دیکھا ہوگا لیکن انٹاریو میں یہ حقیقی مناظر شہریوں نے اپنی آنکھوں سے دیکھا جہاں لڑکی نے اپنے کزن کو خوش کرنے کے لیے ہارمونیکا بجایا تاہم اسے اس وقت لینے کے دینے پڑ گئے جب یہی میوزیکل آلہ اس کے منہ میں پھنس گیا۔
اس حادثے کے بعد لڑکی کی حالت ابتر ہوگئی، وہ نہ کچھ بول پا رہی تھی نہ ہی کچھ کھایا پیا جاسکتا تھا۔ اس نے پورے واقعے کی تفصیل سوشل میڈیا پر بیان کی اور مقبول ترین ویڈیو ایپ ٹک ٹاک پر بھی شیئر کی، جس میں دیکھا جاسکتا ہے کہ لڑکی کچھ بھی کرنے سے قاصر ہے۔
سوشل میڈیا پر اس نے وضاحت کی کہ جب اس کے منہ میں ہارمونیکا پھنسا تو وہ جب جب سانس لیتی اس کے منہ سے میوزک کی آوازیں آتی تھیں۔ واقعے کے فوری بعد متاثرہ لڑکی کو اسپتال لے جایا گیا جہاں ڈاکٹروں نے مخصوص آلے کی مدد سے ہارمونیکا باہر نکالا۔ اس واقعے کے ردعمل میں ٹک ٹاک اور سوشل میڈیا صارفین نے خاتون کا خوب مذاق بھی اڑایا۔
