لاہور: انٹرنیٹ پر نامعلوم شخص نے اے لیولز سیکنڈ ایئرز کے پیپرز لیک کرتے ہوئے دھمکی دی ہے کہ اگر امتحانات منسوخ نہ کیے گئے تو وہ مزید مواد بھی شیئر کردے گا، طلبہ کے مطابق امتحان میں پرچہ بھی بالکل ویسا ہی آیا تھا۔
اے آر وائی نیوز کی رپورٹ کے مطابق سوشل میڈیا پر اے لیولز سیکنڈ ائیر کے پیپرز لیک ہونے کا انکشاف ہوا ہے، نامعلوم شخص نے سوشل میڈیا پر اے لیولز سیکنڈ ائیر کے پیپر اردو پی 2 اور اردو پی 4 کے مضامین لیک کردئیے۔
مبینہ طور پر نقل مافیا سے تعلق رکھنے والے نامعلوم شخص نے انسٹاگرام پر ”کیمبرج ٹیکن ڈاون” کے نام سے اکاؤنٹ بنایا ہوا ہے، جہاں پر وہ پرچوں کا مواد پہلے سے ہی لیک کردیتا ہے۔
مذکورہ شخص نے اگلا پرچہ بھی سوشل میڈیا پر لیک کرنے کا دعویٰ کرتے ہوئے دھمکی دی کہ ’اگر برٹش کونسل اور کیمبرج بورڈ نے امتحانات منسوخ نہیں کیے تو وہ وہ سارے پیپرز لیک کردے گا، جس کے بعد بورڈ کو امتحانات منسوخ کرنا پڑیں گےُ۔
انٹرنیٹ پر پرچے لیک کرنے والا نامعلوم شخص برٹش کونسل اور کیمبرج بورڈ کو چیلنج بھی کر رہا ہے۔
امتحان دینے والے اے لیوز کے طلبہ نے اے آر وائی نیوز سے گفتگو کرتے ہوئے بتایا کہ ’سوشل میڈیا پر جاری پرچے میں جو مضامین بتائے گئے تھے، امتحان میں وہی سب کچھ آیا‘۔
