شاہ لطیف یونیورسٹی کی بڑی نا اہلی منظر عام پر آگئی اور گریجویٹ سطح کے طلبہ کی امتحانی سلپ میں لڑکے اور لڑکیوں کی سلپس میں تصاویر اور نام تبدیل کردیے۔
اے آر وائی نیوز کے مطابق شاہ لطیف یونیورسٹی کے تحت بی ایس سی، بی اے اور بی کام کے امتحانات کے لیے جاری کردہ سلپ میں جامعہ انتظامیہ کی سنگین غلطی سامنے آگئی ہے جس سے طلبہ وطالبات شدید مشکلات کا شکار ہوگئے ہیں۔
شاہ لطیف یونیورسٹی کی جانب گریجویٹ ڈگری پروگرامز کے امتحانات کے لیے طلبہ وطالبات کو جاری کردہ امتحانی سلپس میں لڑکیوں کے ایڈمٹ کارڈ میں لڑکوں اور لڑکوں کے ایڈمٹ کارڈ میں لڑکیوں کی تصویریں لگا دی گئی ہیں۔
صرف یہی نہیں بلکہ کئی میل طلبہ کے ایڈمٹ کارڈ میں جنس کے خانے میں فیمیل درج ہے۔
یونیورسٹی انتظامیہ کی اس سنگین غلطی کے خلاف گورنمنٹ ڈگری کالج نوڈیرو کی طالبات نے احتجاجی مظاہرہ کیا اور غفلت کے مرتکب افراد کے خلاف فوری کارروائی کا مطالبہ کیا۔
