کراچی میں روزانہ متعدد چوری کی وارداتیں ہوتی رہتی ہیں تاہم چوری کی ہوئی ہے ایسی انوکھی واردات جس میں چور نے اپنایا نیا انداز جس کی ویڈیو اے آر وائی نیوز نے حاصل کرلی۔
چوری کی یہ واردات شہر قائد کے مصروف علاقے عزیز آباد میں ہوئی ہے اور یہ واردات رات گئے انجام پائی ہے تاہم رات کی تاریکی میں کی گئی یہ چوری کیمرے کی آنکھ سے نہ بچ سکی اور سی سی ٹی وی فوٹیج اے آر وائی نیوز نے حاصل کرلی۔
ویڈیو میں دیکھا جا سکتا ہے کہ سڑک پر ایک موٹر سائیکل لاوارت حالت میں کھڑی ہے اور ایسا محسوس ہوتا ہے کہ شاید یہ موٹر سائیکل چلتے چلتے خراب ہوگئی اور اس کا مالک مکینک ڈھونڈنے گیا ہے۔
اسی اثنا میں کیمرے میں ایک رکشا نمودار ہوتا ہے جس کا ڈرائیور کھڑی موٹر سائیکل دیکھ کر رکشا روک لیتا ہے۔ پہلے وہ سڑک کے اطراف دیکھتا ہے کہ کوئی اسے دیکھ تو نہیں رہا پھر اس کے بعد اپنے رکشے کو کچھ آگے لے جا کر تاریکی میں کھڑا کر دیتا ہے۔
رکشا ڈرائیور واپس آتا ہے اور موٹر سائیکل کو گھسیٹ کر رکشے کے پاس لے جاتا ہے اور پھر اسے رکشے میں ڈال کر رفوچکر ہوجاتا ہے۔
