The news is by your side.

عامر جمال نے انگلینڈ سے یقینی فتح چھین لی

لاہور: ٹی ٹوئنٹی میں ڈیبیو کرنے والے آل راؤنڈر عامر جمال نے آخری اوور میں 15 رنز کا دفاع کرتے ہوئے پاکستان کو 6  رنز سے فتح دلادی۔

تفصیلات کے مطابق قذافی اسٹیڈیم میں کھیلے جارہے پانچویں ٹی ٹوئنٹی میچ میں پاکستان نے انگلینڈ کو 6 رنز سے شکست دیتے ہوئے سیریز میں 2-3 کی برتری حاصل کرلی۔

مہمان ٹیم 146 رنز کے ہدف کے تعاقب میں مقررہ 20 اوورز میں 7 وکٹوں کے نقصان پر 139  رنز بناسکی، انگلش کپتان معین علی کی دھواں دھارنصف سنچری بھی ٹیم کو نہ جتواسکی۔Image

پاکستان کی جانب سے حارث رؤف نے2کھلاڑیوں کوآؤٹ کیا، محمد نواز اور عامر جمال کے حصے میں ایک ایک وکٹ آئی۔

میچ کی خاص بات ٹی ٹوئنٹی میچ میں ڈیبیو کرنے والے عامر جمال کا آخری اوورز میں 15 رنز کا دفاع کرنا تھا، انگلینڈ کو جیت کے لئے آخری اوور میں 15 رنز درکار تھے جبکہ کریز پر دھواں دھار نصف سینچری اسکور کرنے والے انگلش کپتان معین علی موجود تھے۔

تاہم نوجوان فاسٹ بولر نے نپی تلی بولنگ کرتے ہوئے پاکستان کو 6 رنز سے فتح دلادی۔

اس سے قبل انگلش کپتان معین علی نے ٹاس جیت کر پاکستان کو پہلے بیٹنگ کی دعوت دی، بیٹرز کے ناقص بلے بازی کے باعث پاکستانی ٹیم 19 ویں اوور میں 145 رنز پر ڈھیر ہوگئی تھی۔

اوپنر بیٹر محمد رضوان نے 63 رنز کی اننگز کھیل کر ٹیم کے مجموعے کو قابل قدر بنایا ، محمد رضوان کے علاوہ کوئی بھی پاکستان بیٹرز انگلش بولنگ اٹیک کے سامنے نہ ٹہر سکا، قومی ٹیم کے 8 بیٹرز ڈبل فیگر میں بھی داخل نہ ہوسکے۔

کپتان بابراعظم 9، افتخار احمد 15، عامر جمال 10 رنز بناسکے، میچ میں کھلاڑیوں کی جلد بازی کا اندازہ اس بات سے لگایا جاسکتا ہے کہ دو بیٹرز رن آؤٹ ہوئے۔

انگلینڈ کی جانب سے مارک ووڈ نے تباہ کن بولنگ کرتے ہوئے تین وکٹیں حاصل کیں، ڈیوڈولی اورسیم کرن نے2،2کھلاڑیوں کو پویلین بھیجا۔

اس سے قبل ٹاس کے بعد گفتگو میں قومی ٹیم کے کپتان بابر اعظم کا کہنا تھا کہ ہوم گراؤنڈ میں کھیلنا ہمیشہ خاص ہوتاہے، لاہور کی وکٹ بھی بیٹنگ کیلئے اچھی ہوگی، اگر ٹاس جیت جاتے تو ہم بھی پہلے فیلڈنگ کا فیصلہ کرتے۔

یہ بھی پڑھیں:  ٹی 20 رینکنگ میں محمد رضوان کی بڑی کامیابی

پاکستان نے آج کے اہم ترین میچ میں تین تبدیلیاں کیں، نائب کپتان شاداب خان اور حیدر علی کو فائنل الیون میں شامل کیا  جبکہ عامرجمال آج اپنا پہلا ٹی ٹوئٹنی انٹرنیشنل میچ کھیلا، عثمان قادر، خوشدل شاہ اور فاسٹ بولر محمد حسنین کو آرام دیا گیا۔

انگلش کپتان معین علی کا کہنا تھا کہ پاکستان نے اس سیریزمیں شاندارکرکٹ کھیلی ہے انہوں نے بتایا کہ انگلینڈ کی ٹیم میں چار تبدیلیاں کیں ہیں، کرک ووکس، مارک ووڈ، ڈیوڈ میلان اور سیم کرن  کو فائنل الیون میں شامل کیا گیا ہے۔

Comments

یہ بھی پڑھیں