ممبئی: بالی وڈ کے مسٹر پرفیکٹ اداکار عامر خان کا فلموں سے بریک ختم ہوگیا، انہوں نے اپنے نئے پروجیکٹ کا اعلان کردیا۔
فلم لال سنگھ چڈھا کی ناکامی کے بعد بالی وڈ کے اداکار عامر خان نے اپنے کام سے بریک لیا تھا تاہم اب انہوں نے اپنی اگلی فلم سے متعلق اعلان کیا ہے، یہ فلم ان کی 2007 کی کامیاب فلم ’ تارے زمین پر‘ کی طرح ہوگی۔
بھارتی میڈیا رپورٹ کے مطابق عامر خان نے یہ اعلان ممبئی میں ایک تقریب میں کیا جہاں انہوں نے یہ بھی انکشاف کیا کہ فلم ’ تارے زمین پر‘انہوں نے ایک بچے کی مدد کی تھی، اب اس فلم میں نوجوان لڑکے ہیں جو جذباتی طور پر ان کی مدد کریں گے۔
عامر خان نے 35 سال کے بعد اداکاری سے بریک لے لیا
عامر خان نے بتایا کہ اس فلم کا ٹائٹل ’ ستارے زمین پر ‘ ہے، دوسری جانب یہ قیاس آرائیاں عروج پر ہیں کہ ڈائریکٹر آر ایس پرسانا اس پروجیکٹ کو سنبھالیں گے لیکن عامر نے اعلان کے دوران کوئی نام ظاہر نہیں کیا۔
بالی وڈ کے مسٹر پرفیکٹ نے کہا کہ میں اس بارے میں مزید بات نہیں کرسکتا لیکن میں عنوان بتا سکتا ہوں، فلم کا ٹائٹل ’ستارے زمین پر‘ ہے، آپ کو میری فلم تارے زمین پر تو یاد ہی ہوگی اور اس فلم کا نام ’’ستارے زمین پر‘‘ ہے کیونکہ ہم اسی تھیم کے ساتھ 10 قدم آگے بڑھ رہے ہیں۔
’تارے زمین پر‘ میں عامر خان کی جگہ پہلا انتخاب کونسا اداکار تھا؟
انہوں نے مزید کہا کہ تارے زمین پر ایک جذباتی فلم تھی لیکن یہ فلم آپ کو ہنسائے گی، اُس فلم نے آپ کو رلا دیا یہ آپ کو تفریح فراہم کرے گی۔
واضح رہے کہ ’تارے زمین پر‘ ایک ایسے بچے کی کہانی پر مبنی فلم ہے جس کی پڑھنے لکھنے کی صلاحیت بہت کمزور ہوتی ہے۔ والدین کمزوری کو سمجھنے میں ناکام رہتے ہیں۔ پھر اسکول ٹیچر رام شنکر اس کی ذمہ داری لیتے ہیں۔
