ممبئی: بالی وڈ کے سُپر اسٹار المعروف ’مسٹر پرفیکشنسٹ‘ عامر خان نے بیٹی ارا خان کی اس کے منگیتر نوپور شیکھرے کے ساتھ شادی کی تاریخ بتا دی۔
گزشتہ سال نومبر میں ارا خان نے اپنے بوائے فرینڈ فٹنس ٹرینر نوپور شیکھرے کے ساتھ منگنی کی تھی اور اب جوڑا 2024 میں شادی کے بندھن میں بندھنے کی تیاری کر رہا ہے۔
بھارتی میڈیا کی رپورٹس کے مطابق اداکار عامر خان نے اپنے حالیہ انٹرویو میں بتایا کہ ارا کی شادی آئندہ سال 3 جنوری کو طے ہے، جس لڑکے کا اس نے انتخاب کیا وہ اس کا فٹنس ٹرینر ہے۔
عامر خان نے کہا کہ وہ بہت پیارا لڑکا ہے، جب میری بیٹی ڈپریشن سے لڑ رہی تھی تو اس نے ارا کا ساتھ دیا، یہ وہ لڑکا ہے جو ہر مشکل وقت میں اس کے ساتھ کھڑا رہا۔
سُپر اسٹار نے کہا کہ اطمینان ہے کہ بیٹی نے ایسے لڑکے کو پسند کیا جس میں دونوں کی خوشی ہے، وہ ایک دوسرے سے بہت جڑے ہوئے ہیں اور بہت خیال رکھتے ہیں۔
اداکار نے کہا کہ یہ کہنا کسی فلمی ڈائیلاگ کی طرح ہوگا لیکن وہ میرے بیٹے جیسا ہے۔
انٹرویو میں انہوں نے کہا کہ میں جذباتی ہوں اور ارا کی رخصتی پر بہت زیادہ رونے والا ہوں، فیملی میں اس متعلق ابھی سے گفتگو شروع ہوگئی ہے کہ عامر کو اُس دن کیسے سنبھالنا ہے، میں جذبات میں آنسو یا ہنسی کو قابو نہیں کر سکتا۔
