site
stats
انٹرٹینمںٹ

ترکی کے ’کون بنے گا کروڑ پتی‘ میں عامر خان کی دھوم

بالی ووڈ اداکار عامر خان آج کل ترکی کے دورے پر ہیں جہاں انہوں نے ترکی کے ’کون بنے گا کروڑ پتی‘ (ترک ورژن) میں شرکت کر کے وہاں سے جیتنے والی تمام رقم کو ترکی میں مقیم مختلف ممالک کے پناہ گزینوں کے لیے عطیہ کردی۔

عامر خان نے ترکی کے مقبول ٹی وی شو کون بنے کا کروڑ پتی میں شرکت کی جس کی میزبانی مشہور ترک اداکار مورت یلدرم کرتے ہیں۔

پروگرام کے دوران عامر خان نے کہا کہ یہاں میں اپنے لیے کھیلنے نہیں آیا، بلکہ جیتی ہوئی رقم سے لوگوں کی مدد کرنا چاہتا ہوں۔

پروگرام کے سیٹ پر آتے ہی وہاں موجود ترک حاضرین نے ’عامر، عامر‘ کے نعرے بھی لگائے جس کے بعد عامر خان نے کھڑے ہو کر حاضرین کا شکریہ ادا کیا۔

شو کے دوران عامر خان 1 لاکھ 25 ہزار لیرا (ترک کرنسی ۔ پاکستانی 35 لاکھ روپے سے زائد کی رقم) کے سوال تک جا پہنچے تاہم جواب کے بارے میں مطمئن نہ ہونے پر انہوں نے گیم کو وہیں ختم کرنے کا فیصلہ کیا جس کے بعد انہوں نے 60 ہزار لیرا جیت لیے۔

عامر خان نے بعد ازاں یہ رقم ترکی کے ان فلاحی اداروں کو عطیہ کردی جو ترکی میں موجود پناہ گزینوں کے لیے کام کر رہے ہیں۔

کھیل کے دوران نوبل انعام سے متعلق ایک سوال پر انہوں نے اپنی اہلیہ کرن راؤ کو بھی فون کیا اور ان سے مدد لی۔

پروگرام کے دوران میزبان اور ناظرین نے عامر خان سے ترکی زبان میں سوالات کیے جو عامر خان کو ڈیوائس کے ذریعے انگریزی میں ترجمہ کر کے سنائے گئے، ان کے جوابات عامر خان نے انگریزی زبان میں دیے جس کے بعد کھیل کو ترکی زبان میں ڈب کر کے ترکی چینلز پر پیش کیا گیا۔

یاد رہے کہ عامر خان اپنی حالیہ فلم سیکریٹ سپر اسٹار کی تشہیر کے لیے دنیا بھر کے دورے کر رہے ہیں اور ترکی کے دورے کے دوران وہ ترک صدر رجب طیب اردگان سے بھی ملاقات کر چکے ہیں۔


اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

Print Friendly, PDF & Email
20

Comments

comments

اس ویب سائیٹ پر موجود تمام تحریری مواد کے جملہ حقوق@2018 اے آروائی نیوز کے نام محفوظ ہیں

To Top