ایبٹ آباد :پی پی ایچ آئی کے ڈاکٹروں کوپانچ ماہ سے تنخواہیں نہ ملنے پر ڈاکٹروں نے اس ماہ شروع ہونے والی پولیو مہم کے بائیکاٹ کا اعلان کر دیا۔
ڈاکٹروں کی ہڑتال کے باعث لاکھوں بچوں کا پولیو وائرس سے متاثر ہونے کا خدشہ پیدا ہوگیا ہے ۔ ذرائع کے مطابق پی پی ایچ آئی اور ضلعی انتظامیہ کی نا اہلی کے باعث ضلع بھر کے بی ایچ یوز میں تعینات اکتالیس ڈاکٹروں اور دیگر اسٹاف کو گزشتہ پانچ ماہ سے تنخوائیں ادا نہیں کی گئیں۔
تنخواہوں کی عدم ادائیگی کے باعث سترہ دسمبر سے شروع ہونے والی پولیو مہم کا ڈاکٹروں کی جانب سے بائیکاٹ کا اعلان کیا گیا ہے، اور اس کے ساتھ ساتھ بی ایچ یوز میں او پی ڈیز سروسز بھی بند کرنے کا عندیہ دے دیا ہے۔
جہاں پولیو سے لاکھوں بچوں کے متاثر ہونے کا خدشہ ہے وہیں بی ایچ یوز کی بندش کے باعث دور دراز کے علاقوں کے مکینوں کو مشکلات کا سامنا کرنا پڑ سکتا ہے۔
دوسری جانب پی پی ایچ آئی اور ضلعی انتظامیہ ڈاکٹروں کے مطالبات کو حل کرنے میں مکمل ناکام نظر آرہی ہے۔
