راولپنڈی: وزیرداخلہ شیخ رشید کا کہنا ہے کہ افغان سفیر کی بیٹی کا کیس لاپتہ ہونے کا ہے، اغوا کا کوئی عنصر شامل نہیں۔
تفصیلات کے مطابق راولپنڈی میں نماز عید کے بعد میڈیا سے گفتگو کرتے ہوئے شیخ رشید نے کہا کہ افغان سفیر کی بیٹی ہماری بیٹی کی طرح ہے چند گھنٹے لاپتہ ہوئی، کیس میں اغوا کا عنصر شامل نہیں،ہمیں اغوا کا مطلب پتہ ہے کیا ہوتا ہے؟جب کوئی اغوا کرتاہے تو مطالبے کرتا ہے۔
وزیرداخلہ نے کہا کہ سفیر کی بیٹی چند گھنٹے میں چار ٹیکسی بدلتی ہیں ہماری تحقیقات کے مطابق کسی ٹیکسی میں کوئی بندہ نہیں بیٹھا، انتظار کریں گے افغان سفیر کی فیملی پاکستان آکر کیس لڑے اور ملزمان شناخت کرے،کیاجرائم ممبئی،اترپردیش اور کرناٹکا میں نہیں ہوتے؟ 
شیخ رشید نے کہا کہ اسرائیل اور بھارت ہمارے خلاف ہائبرڈ وار چلا رہے ہیں اس لڑائی میں اصل ہتھیار میڈیا ہے۔
داسو ڈیم کے ملازمین کی بس کے حادثے کے حوالے سے شیخ رشید احمد نے کہا کہ داسو واقعے کی اعلیٰ سطح پر تحقیقات ہو رہی ہے،اس واقعے سے متعلق وزارت خارجہ ہی بہتر بتا سکتی ہے، اس حوالے سے چینی سفارت خانے اوردفتر خارجہ مل کر بیان جاری کریں گے، وزیراعظم نے تمام سیکورٹی انتظامات درست کرنے کی ہدایت کی ہے۔
شیخ رشید نے کہا کہ مریم نواز کشمیر میں غیر پارلیمانی زبان استعمال کررہی ہیں، وہ جو زبان استعمال کررہی ہیں وہ مودی کے نہیں عمران خان کے خلاف ہے۔
