The news is by your side.

Advertisement

حکومت نے بزنس فرینڈلی ماحول کو فروغ دیا، مشیر خزانہ

کراچی: مشیر خزانہ عبدالحفیظ شیخ کا کہنا ہے کہ حکومت نے بزنس فرینڈلی ماحول کو فروغ دیا، وزیراعظم عمران خان چاہتے ہیں کہ اچھے لوگ سامنے آئیں۔

تفصیلات کے مطابق مشیر خزانہ عبدالحفیظ شیخ نے تقریب سے خطاب کرتے ہوئے کہا کہ وزیراعظم کی زیر قیادت ملک کو معاشی صورتحال سے نکالا، سابقہ حکومتوں کے لیے گئے 10 ارب ڈالر کے قرضے دئیے گئے۔

مشیر خزانہ نے کہا کہ معاشی اصلاحات کے دوران مشکلات پیش آئیں، ملکی برآمدات بڑھانے کے لیے موثر اقدامات اٹھائے گئے، بین الاقوامی ادارے پاکستانی معیشت کی تعریف کررہے ہیں۔

انہوں نے کہا کہ ملک میں پہلی بار اسٹیٹ بینک کو خود مختار بنایا ہے، گزشتہ 6 ماہ کے دوران اسٹیٹ بینک سے کوئی قرض نہیں لیا گیا، ہم نہیں چاہتے مہنگائی ہو، قیمتوں میں اضافہ ہو۔

مزید پڑھیں: مشیر خزانہ نے بیرونی کھاتوں میں مزید استحکام کی نوید سنا دی

عبدالحفیظ شیخ نے کہا کہ پیٹرولیم مصنوعات کی قیمتیں پانچ ماہ میں نہیں بڑھائی گئیں، حکومت پیٹرولیم مصنوعات کی قیمتوں میں مجبوراً اضافہ کرتی ہے۔

مشیر خزانہ کا کہنا تھا کہ 5 ماہ میں اسٹیٹ بینک کے ذخائر میں 1 ارب 80 کروڑ ڈالر اضافہ ہوا، اسٹیٹ بینک کے واجبات میں 3 ارب ڈالر کی کمی ہوئی، اس سے فاریکس بفر میں 4 ارب 80 کروڑ ڈالر کا اضافہ ہوا، موجودہ صورت حال بیرونی کھاتوں میں مزید استحکام کا باعث بنے گی۔

خیال رہے کہ چند روز قبل اسٹیٹ بینک نے اپنے اعلامیے میں کہا تھا کہ ایک ہفتے کے دوران ملکی زرمبادلہ کے ذخائر 1.60 ارب ڈالر کا اضافہ ہوا ہے جس کے بعد 13 دسمبر تک ذخائر 17.65 ارب ڈالر تک جا پہنچے۔

Comments

یہ بھی پڑھیں