نارووال: تحریک انصاف کے رہنما اور ہلال احمر کے چیئرمین و پاکستانی گلوکار ابرار الحق نے کرونا کو شکست دے دی۔
سماجی رابطے کی ویب سائٹ پر ابرار الحق نے بتایا کہ ’الحمد اللہ میرا کرونا کا ٹیسٹ منفی آیا ہے، میرے قرنطینہ کے دن مکمل ہوگئے اور آج سے دفتر بھی شروع ہوگیا‘۔
انہوں نے دعاؤں میں یاد رکھنے پر تمام لوگوں کا شکریہ ادا کیا اور متاثرہ افراد کی جلد صحت یابی کے لیے دعا بھی کی۔
Alhamdulliah i have been tested Corona negative and today is my 1st day in the office after quarantine. Thanks to all those who prayed for my success. May Allah swt bless all the patients with quick recovery and keep everyone safe .Ameen
— Abrar Ul Haq (@AbrarUlHaqPK) June 24, 2020
یاد رہے کہ 30 مئی کو ابرار الحق نے بتایا تھا کہ انہیں کرونا کی علامات ظاہر ہوئیں جس کے بعد گلوکار نے خود کو گھر میں قرنطینہ کرلیا تھا اور گھر سے ہی ہلال احمر کے امور انجام دے رہے تھے۔
مزید پڑھیں: کرونا وائرس، ڈاکٹرز سے مشورے کے بعد گھریلو ٹوٹکے استعمال کریں، ابرار الحق کی تجویز
ابرار الحق نے احتیاطاً کرونا کی تشخیص کا ٹیسٹ کروایا جس کی رپورٹ انہیں 31 مئی کو موصول ہوئی جس میں کرونا کی تصدیق ہوئی تھی۔
تحریک انصاف کے رہنما کا کہنا تھا کہ ’مجھے بخار اور خشک کھانسی کی شکایت تھی، جس کا میں نے ڈاکٹر کو بتایا تو انہوں نے ٹیسٹ کروانے کا مشورہ دیا تھا‘۔
یاد رہے کہ اس سے قبل کرونا سے متعدد سیاسی ، سماجی اور معروف شخصیات کرونا سے متاثر ہوچکی ہیں جن میں سے کچھ اراکین اسمبلی دوران علاج دم توڑ گئے۔
دوسری جانب نیشنل کمانڈ اینڈ آپریشن سینٹر کی جانب سے جاری اعلامیے میں بتایا گیا ہے کہ ملک بھر میں کرونا کے مریضوں کی تعداد اضافے کے بعد 1 لاکھ 86 ہزار کے قریب پہنچ گئی ہے۔