کراچی : ٹیلی ویژن کی معروف اداکارہ زرنش خان نے گلوکار و پی ٹی آئی رہنما ابرار الحق کے آج کل کی ماؤں پر دیے گئے حالیہ بیان پر اُن سے اتفاق کرتے ہوئے ناقدین کو کھری کھری سُنادیں۔
زرنش خان نے ابرار الحق کے حالیہ بیان پر ردّعمل دیتے ہوئے فوٹو اینڈ ویڈیو شیئرنگ ایپ انسٹاگرام پر خصوصی اسٹوری شیئر کی ہے۔اداکارہ نے اپنی انسٹاگرام اسٹوری میں ناقدین کو کرارا جواب دے دیا۔
انہوں نے کہا کہ ’اگر کوئی شخص اچھی بات کرتا ہے تو اُس کی بات کواچھا کہیں، اُنہوں نے ڈھکے چھپے الفاظ میں ماڈل نادیہ حسین کو آڑے ہاتھوں لیتے ہوئے کہا کہ اُس شخص کی کہی گئی اچھی بات کو نظر انداز کرکے اُس کی مکمل زندگی پر تبصرے نہ کریں۔
یاد رہے کہ نادیہ حسین نے ابرار الحق کے بیان پر تبصرہ کرتے ہوئے طنزیہ انداز میں کہا تھا کہ آپ نے ماں کی گود سے کلمہ سُنتے سُنتے ’نچ پنجابن‘ اور ’بِلّو کے گھر‘ تک کا سفر پتا نہیں کیسے طے کیا۔
واضح رہے کہ حال ہی میں اسلام آباد میں تقریب سے خطاب کرتے ہوئے ابرارالحق نے کہا تھا کہ جب ہم چھوٹے تھے تو اُس وقت کی مائیں بچوں کو گود میں لے کر اُنہیں کلمہ سُنا کر اور اللّہ تعالیٰ کا نام سُنا کر سُلایا کرتی تھیں اور بچے فوراَ سے سو بھی جاتے تھے۔
ابرارالحق نے موجودہ دور کی ماؤں پر تبصرہ کرتے ہوئے کہا تھا کہ آج کل کی مائیں اپنے بچوں کو گود میں لیتی ہیں اُنہیں موبائل فونز تھما دیتی ہیں جن پر دُعاؤں کے بجائے "بے بی شارک” چل رہا ہوتا ہے۔ سوشل میڈیا صارفین کی جانب سے اُن کے بیان پر اتفاق بھی کیا گیا تھا۔
