واشنگٹن: امریکی صدر ڈونلڈ ٹرمپ نے کہا ہے امریکا کو آئی ایس آئی ایس کے خلاف ایک اور کامیابی ملی ہے، ابوبکر البغدادی کے جانشین کو بھی ختم کر دیا گیا۔
تفصیلات کے مطابق امریکی صدر نے ٹویٹ کرتے ہوئے تصدیق کی ہے کہ داعش کے ہلاک سربراہ ابوبکر البغدادی کے جانشین کو بھی امریکی فوجیوں نے ٹھکانے لگایا، ان کا کہنا تھا کہ جو مارا گیا ہے وہ تنظیم میں اہم مقام پر تھا۔
امریکی صدر نے داعش کے مارے گئے شخص کی شناخت یا اس سے متعلق مزید تفصیل نہیں بتائی، تاہم پیر کو امریکا نے داعش کے ترجمان ابو الحسن المہاجر کی موت کی تصدیق کی تھی، جسے امریکی فورسز نے شام میں مار دیا تھا۔
Just confirmed that Abu Bakr al-Baghdadi’s number one replacement has been terminated by American troops. Most likely would have taken the top spot – Now he is also Dead!
— Donald J. Trump (@realDonaldTrump) October 29, 2019
واضح رہے کہ داعش کے سربراہ ابوبکر البغدادی کی لاش کی باقیات سمندر برد کر دی گئی ہیں، بتایا جا رہا ہے کہ شام میں آپریشن کے دوران امریکی فوج کا ایک کتا ہیرو ثابت ہوا، جس نے داعش سربراہ ابوبکر البغدادی کا بند سرنگ میں پیچھا کیا، فرار کا راستہ نہ ملنے پر داعش سربراہ نے خود کو بم سے اڑا لیا۔
یہ بھی پڑھیں: ابو بکر البغدادی کی ہلاکت ، داعش کا نیا سربراہ کون؟
امریکی صدر ٹرمپ نے ٹویٹر پر ایک کتے کی تصویر شیئر کرتے ہوئے لکھا کہ اس نے ابوبکر البغدادی کو پکڑنے اور ہلاک کرنے کے آپریشن میں حصہ لیا۔
دوسری طرف کرد جنگجوؤں نے دعویٰ کیا ہے کہ البغدادی کی ہلاکت کی تصدیق چوری شدہ انڈر وئیر سے ہوئی، ان کے ایجنٹوں نے اس کا انڈر ویئر چوری کر لیا تھا جس سے حاصل ڈی این اے سے کی موت کی تصدیق کی گئی۔