اسلام آباد : ابوظہبی کے ولی عہد شیخ خالد بن محمد بن زاید النہیان آج پاکستان پہنچ رہےہیں، اس دوران اہم معاہدوں پر دستخط کیے جائیں گے۔
تفصیلات کے مطابق ابوظہبی کے ولی عہد شیخ خالد بن محمد بن زاید النہیان سرکاری دورے پر آج پاکستان پہنچ رہے ہیں۔
ترجمان دفتر خارجہ نے بتایا کہ اعلیٰ سطح کا وفد بھی ولی عہد کے ساتھ اسلام آباد آئے گا۔
دورہ اقتصادی شراکت داری کو مضبوط بنانے کے عزم کا مظہر ہے، دورے میں متعدد معاہدوں اور مفاہمت کی یادداشتوں پر دستخط کیے جائیں گے۔
ذرائع کا کہنا تھا کہ شہزادہ شیخ خالد بن محمد بن زید النہیان کو نشان پاکستان سے نوازا جائے گا اور نشان پاکستان سے نوازنے کیلئےخصوصی تقریب کا انعقاد بھی کیا جائے گا۔
شیخ خالد ابو ظہبی کی سپریم کونسل برائے مالیاتی واقتصادی امور کے رکن اور انویسٹمنٹ اتھارٹی کے بورڈ آف ڈائریکٹرز کے بھی رکن ہیں جبکہ ابو ظہبی نیشنل آئل کمپنی کے بورڈ ممبر بھی ہیں۔
ابوظبی ولی عہد سربراہ نیشنل سیکیورٹی اور ڈپٹی نیشنل سیکیورٹی ایڈوائزر بھی ذمہ داریاں نبھا چکے ہیں، مارچ 2023 میں انہیں ابوظہبی کا ولی عہد اور ابو ظبی ایگزیکٹو کونسل کا چیئرمین مقرر کیا گیا۔
پاکستان میں کاروبار،تجارت ،سرمایہ کاری کے تناظر میں ابوظبی ولی عہد کا دورہ اہمیت کا حامل ہے۔
