ابوظبی: متحدہ عرب امارات کے دارالحکومت ابوظبی نے کرونا ویکسین کی دنیا بھر میں ترسیل کے لیے ہوپ کنسورشیم لانچ کر دیا۔
تفصیلات کے مطابق ویکسین کی ترسیل کی طلب میں متوقع اضافے کے پیش نظر ابو ظبی دنیا بھر میں کو وِڈ 19 ویکسین کی ترسیل کے لیے عالمی لاجسٹک کے مرکز کے طور پر اپنا کردار ادے کرنے کو تیار ہو گیا۔
ابوظبی کا یہ ہوپ کنسورشیم معروف اور عالمی اداروں پر مشتمل ہے، جو کرونا ویکسین کی دنیا بھر میں ترسیل، سورسنگ، اور ڈیجیٹل ٹیکنالوجی کے بنیادی انفرااسٹرکچر کی فراہمی کے ساتھ ویکسین کی آسان دستیابی کے لیے ایک سپلائی چین فراہم کرے گا۔
ہوپ کنسورشیم نے دنیا بھر میں تیار ہونے والی ویکسین کی 6 ارب سے زیادہ خوراکوں کی ترسیل کے لیے لاجسٹک خدمات مہیا کرنے کی غرض سے اپنی صلاحیتوں میں اضافہ کر لیا ہے۔
محکمہ صحت ابوظبی کے چیئرمین شیخ عبد اللہ بن محمد الحامد کا کہنا ہے کہ ہوپ کنسورشیم نہ صرف علاقائی بلکہ عالمی سطح پر بھی سب سے بڑی استعداد کا حامل ہے جو دنیا کو وبا سے نکلنے میں مدد کر رہا ہے۔
انھوں نے کہا کہ ہوپ کنسورشیم بین الاقوامی حکومتوں، غیر سرکاری تنظیموں اور ویکسین فراہم کرنے والوں کو سپلائی چین کی سہولت فراہم کرے گا۔
ان کا کہنا تھا کہ ویکسین تیار کرنا اس مسئلے کے حل تک پہنچنے کا صرف پہلا قدم ہے، ویکسین کو پوری دنیا میں پہنچانا بھی اس کے مساوی چیلنج ہے، امید ہے کنسورشیم اس مسئلے کو معیار کی اعلیٰ سطح کے مطابق انجام دے گا۔
اتحاد ایوی ایشن گروپ کے گروپ چیف ایگزیکٹو افسر ٹونی ڈگلس کا کہنا ہے کہ 4 گھنٹوں کی پرواز کے ساتھ دنیا کے 2 تہائی مقامات تک رسائی کے ساتھ ابوظبی عالمی سطح پر لاجسٹک مرکز کی حیثیت سے خدمات انجام دے سکتا ہے۔
واضح رہے کہ ہوپ کنسورشیم اسکائی سیل کے ہائبرڈ کنٹینر کے ذریعے ویکسین کی ترسیل کرے گا، اسکائی سیل کے چیف ایگزیکٹو آفیسر رچرڈ ایٹل کا کہنا ہے کہ ہمارے ہائبرڈ کنٹینر ویکسین کی مکمل افادیت کو برقرار رکھیں گے جو وبا کو شکست دینے کے لیے انتہائی ضروری ہے۔
