ابوظبی : ٹریفک پولیس نے قوانین کی خلاف ورزیوں پر مقررہ جرمانوں میں50 فیصد مشروط کمی کا اعلان کیا ہے جس کے مطابق 60روز اندر جرمانے کی ادائیگی کرنے والے افراد کو آدھی رقم ادا کرنا ہوگی۔
تفصیلات کے مطابق ابوظبی پولیس نے ٹریفک قوانین کی خلاف ورزیوں پر چالان کی رقم کی پیشگی ادائیگی کا فارمولا جاری کیا ہے۔
پولیس حکام کا کہنا ہے کہ مقررہ جرمانوں میں50 فیصد مشروط کمی کی جارہی ہے جس کا اطلاق اتوار22 دسمبر سے ہوگا۔
ابوظبی پولیس کی جنرل کمانڈ کا کہنا ہے کہ ٹریفک قوانین کی خلاف ورزی کرنے والے60 دن کے اندر عائد جرمانہ ادا کردیتے ہیں تو اس صورت میں جرمانے کی رقم میں 50 فیصد کمی کردی جائے گی۔
اس کے علاوہ خلاف ورزی پر گاڑی تحویل میں لینے اور تاخیر پر جرمانہ ہوا تو اس میں 35فیصد کمی کی جائے گی۔
ابوظبی ٹریفک پولیس کے جاری کردہ چارٹ کے مطابق28 اقسام کی سنگین خلاف ورزیاں کرنے والے افراد رعایتی فارمولے سے مستثنیٰ ہوں گے۔
