اسلام آباد: احتساب عدالت نے سابق وزیر خزانہ اسحاق ڈار کے دائمی وارنٹ گرفتاری معطل کردیئے۔
تفصیلات کے مطابق اسلام آباد کی احتساب عدالت میں سابق وزیرخزانہ اسحاق ڈار کے دائمی وارنٹ گرفتاری کے خلاف درخواست پر سماعت ہوئی۔
احتساب عدالت کےجج محمدبشیر نے درخواست پرسماعت کی، سابق وزیرخزانہ اسحاق ڈارکےوکیل قاضی مصباح عدالت کے روبروپیش ہوئے۔
اسحاق ڈار کے وکیل قاضی مصباح کی جانب سے دلائل کا آغاز کیا گیا تو جج نے استفسار کیا اسحاق ڈاربیمارتھے یا کوئی اور مسئلہ تھا۔
وکیل نے استدعا کی اسحاق ڈارکےدائمی وارنٹ گرفتاری منسوخ کیےجائیں، اسحاق ڈار ایئر پورٹ پر اتر کر سیدھے عدالت پیش ہو جائیں گے۔
جج نے استفسار کیا کہ افضل قریشی پراسیکیوٹر کہاں ہے، جس پر ڈیوٹی پراسیکیوٹر نے بتایا کہ وہ عمرہ کی ادائیگی کیلئےگئےہوئے ہیں۔
جس کے بعد احتساب عدالت نے اسحاق ڈار کے دائمی وارنٹ گرفتاری معطل کردیئے، اسحاق ڈار کے دائمی وارنٹ 7اکتوبرتک معطل کئے گئے۔
عدالت نے کہا کہ وارنٹ گرفتاری مکمل طور پرکینسل اسوقت ہوں گے جب ملزم پیش ہوگا۔
یاد رہے وزیر خزانہ اسحاق ڈار نے وارنٹ گرفتاری کےخلاف درخواست دائر کی تھی ، جس میں کہا تھا اسحاق ڈار سرنڈر کرنے کے لیے تیار ہیں انکو واپسی پر گرفتار نہ کیا جائے
